Reynir hjólar í Helgu Völu: „Skömm hennar er mikil“ – Ó­trú­leg þöggun í gangi

Reynir Trausta­son, rit­stjóri Mann­lífs, segir að Helgu Völu Helga­dóttur, þing­konu Sam­fylkingarinnar, væri nær að taka mál­efni Landa­kots upp í þing­nefnd í stað þess að vega að Einari Þor­steins­syni frétta­manni á sam­fé­lags­miðlum.

Reynir gerir mál málanna í dag, um­deilt við­tal Einars við Má Kristjáns­son yfir­lækni smit­sjúk­dóma­deildar Land­spítalans í Kast­ljósi í gær­kvöldi, að um­tals­efni í pistli á vef Mann­lífs. Einar hlaut nokkuð harða gagn­rýni vegna við­talsins, einkum frá Helgu Völu Helga­dóttur.

Sjá einnig:
Einar svarar eftir umdeilt viðtal: „Ég var bara mjög kurteis og greip lítið frammí“

Einar: Færsla Helgu Völu til þess fallin að særa fram tröll

Reynir kemur Einari hins vegar til varnar í pistlinum og segir að hann hafi einungis gert það sem góðum frétta­manni ber að gera. Endur­taka spurningarnar ef ekki fást svör.

Reynir segir að ó­trú­leg þöggun sé í gangi um ó­hugnaðinn á Landa­koti.

„Alls hafa 12 manns látið lífið og tugir manna veikst vegna veirunnar sem þar geysaði um stofur og ganga og barst þaðan á önnur hjúkrunar­heimili. Þessi and­lát voru ó­tíma­bær og þurftu ekki að verða ef fólk hefði lesið á­standið rétt og gætt að sótt­vörnun innan spítalans.“

Reynir segir að það hafi verið furðu­gjörningur að Már, undir­maður for­stjóra Land­spítalans, hafi fengið það hlut­verk að rann­saka at­vikin á Landa­koti.

„Lagt var upp með það að ekki stæði til að kenna neinum um eða hengja ein­hvern í hæsta gálga. Það er eðli­legt sjónar­mið að gæta allrar var­úðar í rann­sókninni en eins ó­eðli­legt og hugsast getur að fela starfs­liði spítalans að rann­saka sjálft sig.“

Reynir vindur sér síðan að við­brögðum Helgu Völu eftir við­tal Einars við Má í Kast­ljósi í gær­kvöldi. Helga Vala sagðist vera bæði „orð­laus og rasandi“ eftir við­talið og sagðist telja að Einar hefði sett „nýtt met.“

„Helga Vala Helga­dóttir, al­þingis­maður Sam­fylkingar, er ein þeirra sem vegur að heiðri Einars Þor­steins­sonar frétta­manns í Kast­ljósi og efnir til ó­vina­fagnaðar gegn honum. Einar gerði að­eins það sem góðum frétta­manni ber. Hann endur­tók spurningar þegar hann fékk ekki svör. Hann stóð sig með sóma í því að varpa ljósi á mál sem ber öll ein­kenni yfir­klórs og þöggunar. Þing­maðurinn ætti að láta ó­gert að vega að frétta­manninum. Það ber vott um lítil­mennsku þess sem ætlar að stökkva á vin­sælda­vagn hræsninnar, vekja upp nettröll, og hengja boð­bera hinna vá­legu tíðinda. Helga Vala hefði gert betur í því að taka málið upp í þing­nefnd og rann­saka þaðan hvað það var sem kostaði þessar mann­fórnir. Skömm hennar er mikil og henni aug­ljós­lega illa treystandi til að veita að­hald í sam­fé­laginu.“

Hér má lesa pistil Reynis í heild sinni.