Reynir: Fitu­for­dómar ekki það sama og vera á móti því að fólk drepi sig úr heilsu­leysi

„Það er eitt að vera með fitu­for­dóma, en annað að vera á móti því að fólk sé að drepa sig úr heilsu­leysi,“ segir Reynir Trausta­son, einn reyndasti fjöl­miðla­maður Ís­lands, í nýjasta hlað­varps­þætti Sölva Tryggva­sonar.

Í við­talinu fara þeir Reynir og Sölvi um víðan völl, en eins og kunnugt er var Reynir rit­stjóri DV um langa hríð og einn af eig­endum miðilsins. Þá talar hann um heilsuna en Reynir gerði rót­tækar breytingar á lífs­stíl sínum fyrir rúmum ára­tug og hefur ekki litið um öxl síðan. Hann var farinn að óttast um líf sitt vegna of­fitu og heilsu­leysis.

„Ég er reyndar lík­lega búinn að létta mig um 500 kíló saman­lagt í gegnum tíðina. En þegar ég á­kvað að taka mig í gegn fyrir al­vöru, þá gerðist það eftir ein ára­mótin þegar var orðinn 140 kíló. Ég hafði hætt að reykja og bætti í kjöl­farið á mig 30 kílóum. Ég átti flottustu pípurnar í bænum og hafði reykt mikið, en ég fór með dóttur minni út í garð og við grófum holu og ég jarðaði pípurnar og við fórum saman með hug­vekju um að ég væri hættur að reykja. En í kjöl­farið þyngdist ég hratt,“ segir Reynir.

Þegar hann var búinn að þyngjast um 30 kíló á­kvað hann að eina leiðin til að ná árangri væri að gefa út yfir­lýsingu opin­ber­lega til að halda sér á­byrgum.

„Ég stofnaði blogg sem hét „Bar­áttan við holdið“ og sagðist ætla á Hvanna­dals­hnjúk eftir eitt ár og svo Mont Blanc í fram­haldinu. Að vísu liðu 3 ár þar til ég komst upp á Mont Blanc, en þetta var gæfa mín að gera þetta svona. Síðan 2010 er ég búinn að fara á yfir 2.100 tinda. Að vísu er hægt að fara 4 ferðir á toppinn á Úlfars­fellið sama daginn og það telur sem 4 tindar, en ég fór mest 350 fjall­göngur á einu ári. En ég held að þetta sé það sem hafi bjargað mér, af því að ég verð svo manískur þegar ég set mér mark­mið og geri allt til að standa við það. Matar­æðið og lífs­stílinn byrjaði að batna sam­hliða fjall­göngunum.“

Reynir segist ekki vita hvar hann væri í dag ef hann hefði ekki tekið sig í gegn fyrir tíu árum.

„Ég var reykinga­maður, ég var of­fitu­sjúk­lingur og svo var ég í versta djobbi á Ís­landi sem rit­stjóri DV með alla streituna sem því fylgdi. Nú hef ég tekið reykingarnar út, létt mig og lét svo reka mig af DV.”

Reynir, sem hefur nú gífur­lega ást­ríðu fyrir úti­vist, segist telja að stóra málið í sam­fé­laginu sé að reyna að stoppa far­aldur heilsu­leysis og lífs­stíls­sjúk­dóma:

„Þú getur bjargað lífi manns með því að fá hann til að taka þátt í úti­vist. Hvort sem það er þung­lyndi, at­hyglis­brestur eða aðrir lífs­stíl­skvillar, það byrjar allt að lagast þegar þú ferð út í náttúruna og labbar á fjöll. Mér finnst þetta vera stóra málið á næstu árum að við hjálpum fólki að bjarga sér frá sjálfu sér. Þegar lífs­stíls­sjúk­dómar eru farnir að drepa flesta er þetta stóra málið. Þeir stjórn­mála­menn sem átta sig á þessu og setja lýð­heilsu í for­gang, þeir munu gera mikið gagn. Ég veit ekki ná­kvæm­lega hvernig á að út­færa það, en við verðum að gera eitt­hvað í þessum málum. Það er eitt að vera með fitu­for­dóma, en annað að vera á móti því að fólk sé að drepa sig úr heilsu­leysi. ”