Kári Stefánsson, forstjóri Íslenskrar erfðagreiningar, rær nú öllum árum að því að reyna að tryggja Íslendingum bóluefni og hefur verið í óformlegum samskiptum við framleiðendur á borð við Pfizer og Moderna.
Hann segist hafa efasemdir um að hagsmunum Íslands hafi verið best gætt með því að tryggja sér bóluefni við COVID-19 í samfloti við Evrópusambandið (ESB) og leitar nú leiða til að fá sendingu afhenta á undan skammti ESB.
„Evrópusambandið virðist hafa hreyft sig á skringilegan máta, veðjað á þá hesta sem hafa kannski ekki staðið sig best, og nú þjáumst við fyrir það,“ segir Kári.
Síðasti skammtur Pfizer kemur í mars
Mikið hefur verið rætt um bóluefnaáætlanir íslenskra stjórnvalda síðastliðna daga en nokkur óvissa er talin ríkja um aðgengi Íslendinga að bóluefni. Sem stendur hafa stjórnvöld samið við þrjá lyfjaframleiðendur um afhendingu skammta fyrir 435 þúsund einstaklinga en einungis liggur fyrir afhendingaráætlun vegna bóluefnis Pfizer og BioNtech.
„Í mínum huga er ekki búið að semja um neinn skapaðan hlut fyrr en við vitum hvenær bóluefnið kemur. Það eina sem við vitum núna er að 50 þúsund skammtar af bóluefni Pfizer, sem dugar fyrir 25 þúsund manns, eigi að koma með viku fresti í 13 vikur og síðasti skammturinn komi þá í lok mars.“
Ljóst sé að sá skammtur dugi fyrir innan við tíu prósent þjóðarinnar.
Kári leggur áherslu á viðræðurnar séu „á eins yfirborðskenndu stigi og hægt er“ og að brugðið geti til beggja vona.
Nánar má lesa um tilraunir Kára á vef Fréttablaðsins.
