„Við gerum minna! Þrátt fyrir meiri pening og fleiri starfsmenn,“ segir Ragnar Freyr Ingvarsson læknir.
Ragnar deilir þar umfjöllun Viðskiptablaðsins á dögunum þar sem fjallað var um nýlega skýrslu heilbrigðisráðuneytisins. Í skýrslunni er meðal annars bent á það að fjármögnun íslenskra sjúkrahúsa sé óskilvirk og þá sé ein mesta starfsmannafjölgunin hjá starfsfólki sem vinnur „önnur“ störf á spítalanum.
Ragnar skrifaði færslu á Facebook um helgina sem vakti talsverða athygli en í henni nefnir hann að um sé að ræða aðra svarta skýrslu um frammistöðu LSH á liðnu ári. Sú fyrri hafi fjallað um bráðamóttökuna og ástandið sé nær óbreytt.
„Fjöldi starfsmanna hefur stóraukist á liðnum 5 árum en framleiðni hefur minnkað - við gerum minna! Minna! Öllu þessu fólki hefur verið raðað inn á skrifstofur deilda sem EKKI sinna sjúklingum.“
Ragnar merkir Svandísi Svavarsdóttur heilbrigðisráðherra í grein sinni og segir að hún hafi greint stolt frá því í Morgunblaðinu síðasta haust að hafa aukið fjárframlög um meira en þriðjung til opinbera kerfisins.
„Takk kærlega! En, við eyddum því í skrifstofufólk og stóla undir þessa skrifstofustarfsemi! Nýtt lag af stjórnendum (nýtt skipurit) með nýjar glæsilegar skrifstofur með fjölda rýma. Við getum ekki endalaust bætt við verkefnastjórum, gæðastjórum og millistjórnendum þegar okkur vantar fólk á gólfið! Þetta þarf að skoða og svo endurskoða.“
