„Árum saman höfum við reynt að koma stjórnvöldum í skilning um þessa stöðu en einungis fengið starfshóp eftir starfshóp og nefnd eftir nefnd en engar aðgerðir eða efndir,“ segir Ragnar Þór Ingólfsson, formaður VR, í pistli á Facebook, en Fréttablaðið greinir frá.
Ragnar birtir skjáskot af auglýsingu sem finna má á fasteignavef mbl.is, en þar er boðin í útleigu þriggja herbergja íbúð á 375 þúsund krónur á mánuði. Bendir Ragnar á að það sé töluvert yfir lægstu launatöxtum sem voru fyrir skatt rúmar 367 þúsund krónur fyrir hækkanir síðustu kjarasamninga. Ragnar gerir leigumarkaðinn almennt að umtalsefni í færslu sinni og bendir á að Bjarg Íbúðafélag, sjálfseignarstofnun um húsnæði sem er rekin án hagnaðarmarkmiða, sé með sambærilega íbúð til leigu við Tangabryggju á 166 þúsund krónur. Frá því verði dragast húsaleigubætur.
„Leigufélagið Alma hefur borið fyrir sig markaðinn þegar tugþúsunda hækkunum, umfram vísitölu, er hellt yfir viðskiptavini þeirra með reglulegu millibili og er viðbúið að þetta nýja viðmið markaðarins á Tangabryggju verði notað við næstu 12 mánaða endurskoðun þeirra þegar viðskiptavinir þeirra fá “boð” um endurnýjun á leigusamningi.“
Ragnar segir að Bjarg íbúðafélag, sem stofnað var af ASÍ og BSRB, hafi verið að skila af sér dýrustu blokk sem félagið hefur byggt við Maríugötu í Garðabæ. Ragnar Þór gagnrýnir aðgerðaleysi stjórnvalda í húsnæðismálum og vandar stjórnvöldum ekki kveðjurnar í pistli sínum.
„Árum saman hefur stefnt í eina alvarlegustu húsnæðiskreppu síðari ára. Árum saman höfum við reynt að koma á leigubremsu. Árum saman höfum við bent á að helsti drifkraftur verðbólgu er framboðsskortur á húsnæði. Árum saman höfum við reynt að fá lífeyrissjóði til að fjárfesta í uppbyggingu á húsnæðismarkaði. Árum saman höfum við reynt að koma stjórnvöldum í skilning um þessa stöðu en einungis fengið starfshóp eftir starfshóp og nefnd eftir nefnd en engar aðgerðir eða efndir.“
Ragnar segir stöðuna í dag vera þannig að húsnæðismarkaðurinn er botnfrosinn. Framkvæmdir dragist saman og það stefni í algjört óefni.
„Hátt vaxtastig og aðgerðir Seðlabankans hafa þannig lokað á eftirspurnarhliðina, og framboðshliðin er að lokast líka. Á meðan hefur ríkisstjórnin mestar áhyggjur af stöðunni á vinnumarkaði og hvernig helst sé hægt að beisla hann með lögum. Og hvernig kjarasamningar, en þar hækkuðu laun um 35.000 til 66.000 kr. á mánuði, séu nú helsta ógnin við stöðugleika. Þetta er það eina sem þau hafa til málanna að leggja á meðan þingfararkaupið, sem er Kr. 1.345.582.- og hefur hækkað um 582.642 í krónum talið frá árinu 2016, mun að öllum líkindum hækka um að lágmarki 115.000 kr. við næstu endurskoðun í júlí ef við áætlum hver 12 mánaða launavísitala verði þá.“
Ragnar Þór endar pistil sinn svo á að senda Bjarna Benediktssyni, fjármálaráðherra tóninn.
„Fjármálaráðherra telur okkur aldrei hafa haft það betra á meðan bankarnir öskra eftir enn hærri vöxtum svo þeir geti gengið á eigið fé almennings sem myndast hefur í húsnæði þeirra. Staðan versnar bara og versnar. Þetta er vitskert veröld sem við búum í.“
