Ragnar Þór – „Starfsfólki sýndur dónaskapur [...] Vinsamlegast deilið“

Starfs­fólk í hinum ýmsu verslunum hefur verið sýndur dóna­skapur af sumum við­skipta­vinum undan­farið. Er þetta oft vegna hluta sem starfs­fólkið hefur ekkert um að segja. Ragnar Þór Ingólfs­son, for­maður VR, segir í sam­tali við Hring­braut og Frétta­blaðið að margt starfs­fólk sé á­hyggju­fullt vegna á­standsins í sam­fé­laginu sem rekja má til CO­VID-19 eða kóróna-veirunnar. For­maðurinn segir starfs­menn leggja heilsu sína undir og á­lagið í stór­mörkuðum sé sam­bæri­legt við góða jóla­ver­tíð.

Ragnar Þór vakti fyrst at­hygli á á­standinu á Face­book-síðu sinni þar sem hann segir VR hafa fengið fjöl­margar kvartanir. Ragnar Þór segir:

„Nokkuð hefur borið á því að starfs­fólki verslana sé sýndur dóna­skapur. VR hefur borist tölu­vert af kvörtunum þess efnis. Það er mikil­vægt að fólk hafi í huga að allir eru að gera sitt besta í að halda sam­fé­laginu gangandi.“

Í sam­tali við Hring­braut segir Ragnar Þór þegar hann er beðinn um að lýsa á­standinu í verslunum nánar:

„Þetta lýsir sér í al­mennum pirring þar sem við­skipta­vinir hreyta ó­notum í starfs­fólk vegna hluta sem lítið er hægt að gera við. Sem betur fer eru flestir sem hrósa en það er bara mjög sárt að vita til þess að fólk sem leggur heilsu sína undir og gerir sitt allra besta skuli sitja undir pirring eða öðrum dóna­skap þar sem álag er búið að vera sam­bæri­legt og í góðri jóla­ver­tíð hjá t.d. stór­mörkuðum.“

Þá segir Ragnar Þór á Face­book að eðli­legt sé að vera á­hyggju­fullur í þeirri ó­vissu sem nú ríkir en það skili sér bæði í þreytu og streitu og þá geti verið stutt í pirring. Ragnar segir:

„Við megum ekki undir nokkrum kring­um­stæðum láta það bitna á fram­línu­fólki í verslunum sem leggur heilsu sína undir í að sjá okkur fyrir nauð­synja­vörum og annarri þjónustu sem við teljum sjálf­sagða á tímum sem þessum. Starfs­fólk í verslun er í hópi þeirra sem halda sam­fé­laginu gangandi.“

Ragnar Þór bendir á að mikil­vægt sé að Íslendingar komi vel fram við hvorn annan og standi saman á þessum erfiðu tímum.

Verum dug­leg að hrósa,“ segir Ragnar Þór og skorar á fólk að koma skila­boðunum á­leiðis. Hann segir ein­fald­lega:

„Vin­sam­lega deilið.“