Ragnar svarar Maríu: „Ég hefði kannski frekar átt að nota orðið spilling og biðst af­sökunar á því“

„Þetta kallast klíku­stjórnun í mínum bókum. Ég hefði kannski frekar átt að nota orðið spilling og biðst af­sökunar á því,“ segir Ragnar Þór Ingólfs­son, for­maður VR, í pistli á Face­book-síðu sinni.

Þar svarar hann Maríu Stefáns­dóttur, sölu­stjóra Icelandair, sem skrifaði pistil um mál­efni Icelandair í gær. Pistill Maríu snerist öðrum þræði um stöðu fé­lagsins og orð Boga Nils Boga­sonar sem sagði í bréfi til starfs­manna um helgina að helsta fyrir­staða þess að hægt væri að bjarga Icelandair frá falli væru starfs­mennirnir. María vildi meina að orð hans hefðu verið mistúlkuð. Hún gagn­rýndi svo Ragnar Þór sem gerði ein­mitt um­mæli Boga að um­tals­efni um helgina.

Óábyrgt og ósanngjarnt

„Í þessu ljósi þótti mér, sem fé­lags­manni í VR, ömur­legt að lesa um á­rásir Ragnars Þórs Ingólfs­sonar, formanns fé­lagsins, á stjórn­endur Icelandair og hvernig hann kýs að snúa út úr orðum for­stjórans Ragnar Þór talar um „stjórn­enda­klíku” Icelandair og veltir fyrir sér hvort ekki væri rétt á þessum tíma­punkti að skipta út stjórn­endum. Það blasir við hversu ó­á­byrg og ó­sann­gjörn þessi orð eru,“ sagði María meðal annars.

Í pistlinum sem Ragnar Þór skrifaði í morgun segir hann Maríu ekki færa nein rök gegn því sem hann skrifaði um feil­spor stjórn­enda fyrir­tækisins í gegnum tíðina. Segir hann Maríu telja enga aðra leið í stöðunni en að skerða kjör starfs­fólks því ekki taki betra við ef fé­lagið verður tekið yfir. Bendir Ragnar á í fram­hjá­hlaupi að launa­kostnaður Icelandair, í al­þjóð­legum saman­burði, hafi lækkað um 20% frá ára­mótum vegna veikingar krónunnar.

Kjör og kjarasamningar virtir

Ragnar segir enn fremur að um­ræðan snúist ekki ein­göngu um Icelandair heldur frekar við­horf æðstu stjórn­enda í at­vinnu­lífinu. Þeir virðist ætla að nýta sér kreppuna sem nú er til að kúga fram launa­lækkanir og af­sal mikil­vægra réttinda sem tekið hefur ára­tugi að ná.

„Ég tel full­víst að fé­laginu verði bjargað. Ef ríkið kemur þar að málum, sem allar líkur eru á, með mögu­legri að­komu líf­eyris­sjóða munum við sem skatt­greið­endur og eig­endur líf­eyris­sjóðanna aldrei sætta okkur við annað en að kjör og kjara­samningar starfs­fólksins verði að fullu virt svo sómi sé af.“

Ragnar út­skýrir svo hvað hann átti við þegar hann notaði orðið „stjórn­enda­klíka“ í pistli sínum um helgina. „Átti ég t.d. við þegar Björg­ólfur Jóhanns­son steig til hliðar til að axla á­byrgð á slæmri stöðu fé­lagsins, á mesta góð­æris­tíma flug­sögunnar, og rétti kyndilinn yfir í vinstri höndina sem nú­verandi for­stjóri var á þeim tíma,“ segir hann og nefnir fleiri dæmi.

„Þetta kallast klíku­stjórnun í mínum bókum. Ég hefði kannski frekar átt að nota orðið spilling og biðst af­sökunar á því. Ég gæti svo skrifað sér­stakan pistil um klíkuna í kringum æðstu stjórn­endur ef þess er sér­stak­lega óskað og færa frekari rök fyrir máli mínu.“

Tekur undir áhyggjur Maríu

Ragnar segir sam­kennd, ein­lægni og á­hyggjur yfir stöðu starfs­fólksins skína í gegn í pistli Maríu. Undir þær á­hyggjur tekur hann heils­hugar. „Hún hefur eðli­lega mikla sam­kennd og stolt með fyrir­tækinu sem hún starfar hjá og skil ég þá af­stöðu mjög vel enda þekki ég mikið af frá­bæru starfs­fólki sem vinnur hjá Icelandair og sárnar þegar vinnu­staðurinn minn og starfs­fé­lagar liggja undir á­mæli.“

Ragnar bendir á að María sé stjórnandi en kannski ekki sú gerð stjórnanda sem hann átti við í pistlinum og biður hann hana af­sökunar á því. „Það var þó við­búið að stjórn­endur bregðist við með ein­hverjum hætti og get ég tekið undir orð Maríu að túlka mætti orð for­stjórans á þá vegu sem hún lýsir. Og vert að taka fram að for­maður VR er ekki hafin yfir gagn­rýni frekar en aðrir í þjóð­fé­laginu og vil ég nota tæki­færið og hrósa henni fyrir góðan pistil þó ég sé ekki sam­mála öllu sem hún skrifar.“

Ragnar segir einnig í pistlinum að alveg sama hversu staðan er slæm þá megum við ekki beygja okkur undir hæl al­þjóða­væðingarinnar. „Hún verður að verða á for­sendum vinnandi fólks. Endur­reisnin verður að vera á for­sendum okkar. Í kreppum eigum við að hlúa að okkar veikustu bræðrum og systrum, setja súr­efnis­grímuna á fólkið og svo fyrir­tækin.“

Pistla þeirra Ragnars og Maríu má sjá hér að neðan.