Ragnar Þór Ingólfsson, formaður VR, segir margt í okkar samfélagi minna óþægilega á aðdraganda og eftirmála hrunsins 2008.
Ragnar gerði þetta að umtalsefni í færslu á Facebook-síðu sinni í vikunni en tilefnið var sýning Óskarsverðlaunamyndarinnar The Big Short á RÚV á laugardagskvöld.
Myndin segir einmitt frá aðdraganda efnahagshamfaranna sem riðu yfir heiminn 2008. Fylgst er með fjárfestum sem veðjuðu gegn bandaríska húsnæðiskerfinu á árunum 2006 og 2007 en eins og alþjóð veit hrundi kerfið árið 2008 með gríðarlegum afleiðingum um allan heim, meðal annars hér á landi.
Marinó G. Njálsson, stofnfélagi í Hagsmunasamtökum heimilanna, skrifaði pistil um myndina sem Ragnar Þór deildi en í pistli sínum sagðist Marinó horfa á myndina að jafnaði einu sinni á ári.
Í pistli sínum sagði Marinó að margt hefði verið gert frá hruni en eitt hafi þó vantað: Siðbót. „Ef eitthvað er, þá hafa menn forherst. Þeir sem hafa vald misnota það of oft. Eigi þeir pening, þá virðast þeir sýkjast af græðgi. Auðugt fólk virðast aldrei fá nóg, þó það muni ALDREI geta notað allan auð sinn. Og ekki kemur til greina að rétta hlut þeirra verst settu,“ sagði Marinó meðal annars og tók Ragnar Þór undir.
Ragnar Þór sagðist einmitt horfa reglulega á þessa tilteknu mynd til að minna sig á hversu risastórt verkefnið er sem heimilin og almenningur standa frammi fyrir. Hann kynntist Marinó árið 2009 þegar þeir voru í hópi fólks úr öllum áttum sem misbauð það aðgerðarleysi stjórnvalda gagnvart heimilum.
„Eitt af því sem hrunið leiddi af sér var að sterk pólitísk tenging verkalýðshreyfingarinnar við ríkjandi öfl stjórnmálanna raungerðist í sögulegu aðgerðarleysi og meðvirkni sem endaði með skelfilegum afleiðingum fyrir heimilin. En líka að fólkið tók málin í sínar hendur, að eigin frumkvæði. Stofnaði hagsmunasamtök, stjórnmálaflokk, mótmæltu á Austurvelli og gerðu hallarbyltingar í stærstu stéttarfélögunum,“ segir Ragnar sem bendir að blikur séu mögulega á lofti.
„Það er margt að gerast í okkar samfélagi sem minnir óþægilega á aðdraganda og eftirmála hrunsins 2008. Á meðan viðvörunarbjöllur hringja eru stjórnvöld algjörlega sofandi og það sem verra er að það virðist vera meðvitað. Því ekki vantar varnarorðin. Ég hvet ykkur til að horfa á The Big Short og horfa á hana aftur og aftur. Ég hvet ykkur líka til að lesa allt sem Marinó G. Njálsson skrifar,“ segir Ragnar Þór í færslu sinni sem má sjá hér að neðan.