„Skyldi engan undra þótt fylgi gömlu flokkanna hafi minnkað, ójöfnuðurinn er slíkur að vart verður við unað lengur,“ segir Ragnar J. Jóhannesson, eldri borgari, í aðsendri grein á vef Vísis.
Ragnar vísar í nýlegar fréttir, meðal annars frá Argentínu, þess efnis að yfirvöld hafa ákveðið að leggja aukaskatt á alla sem eiga eignir yfir 300 milljónir króna. Í tilfelli Argentínu er um að ræða 3% eignaskatt á eignir yfir 300 milljónir króna. Er þetta gert til að mæta auknum útgjöldum vegna COVID-19-faraldursins.
Ragnar furðar sig á því að ekki sé það sama uppi á teningnum hér á landi.
„Ríkisstjórn Íslands hefur aftur á móti lækkað skatta á fólki um 34 milljarða sem hefur svipaða afkomu. Ríkisstjórn Íslands ætlar að hafa annan hátt á, hún ætlar að brúa bilið með milljarða láni sem þarf að greiða á næstu árum og þá með skattlagningu á borgarana og fyrirtæki þ.m.t. öryrkja og eldri borgara.“
Í pistli sínum gerir Ragnar umræðu í spjallþættinum Silfur Egils að umtalsefni. Þar hafi menn verið undrandi á því hve fylgi gömlu flokkana hefði minnkað. Segir Ragnar að það skyldi engan undra þótt fylgi gömlu flokkanna hafi minnkað, ójöfnuðurinn sé slíkur að vart verður við unað lengur.
„Það sætti furðu að hér fyrr á árum var Sjálfstæðisflokkurinn, flokkur allra stétta, með 42% fylgi en er nú með 20%+. Stjórn flokksins áttar sig ekki á því að fólkið sem skapar verðmætin þ.e. fólkið sem dregur vagninn er orðið afhuga þessum flokki og öðrum sem hugsa og framkvæma eins.“
