„Það hefur verið í fjölmiðlum í vikunni að til standi að taka á leigu tíu hús fyrir flóttafólk og í síðustu viku var opnað Batahús fyrir konur sem eru að ljúka afplánun en við eigum bara enn að vera úti,“ segir Ragnar Erling Hermannsson, heimilislaus maður í Reykjavík, í samtali við Fréttablaðið í dag.
Ragnar Erling er félagi í Viðmóti, samtökum um mannúðlega vímuefnastefnu á Íslandi, og segir hann ósanngjarnt að heimilislausir séu látnir vera úti í kuldanum á meðan aðrir hópar samfélagsins fá aðstoð.
Ragnar ásamt félögum sínum í Viðmóti hefur krafist þess að opnuð verði aðstaða fyrir heimilislausa karlmenn í Reykjavík. Gistiskýli séu ekki opin á daginn og þá hafi mennirnir engan stað að vera á.
„Í fyrra var opnað úrræði fyrir konur og það gengur vel svo ég skil bara ekki af hverju það er ekki hægt að gera það fyrir okkur líka,“ segir Ragnar í samtali við Fréttablaðið í dag og vísar þar til Skjólsins, úrræðis fyrir heimilislausar konur sem rekið er af Hjálparstarfi kirkjunnar. Skjólstæðingar geta leitað þangað yfir daginn þegar lokað er í Konukoti.
„Og svo það sé á hreinu þá snýst þetta ekki um að fólkið sem um ræðir sé flóttafólk eða konur. Ég vil að við tökum á móti flóttafólki og hælisleitendum og veitum þeim skjól, ég vil bara líka fá hjálp, það ætti að vera hægt að hjálpa okkur öllum,“ segir Ragnar í Fréttablaðinu í dag.
Nánar um málið á vef Fréttablaðsins.
