Rafn baunar á stjórn­völd: Tapar að minnsta kosti 20 milljónum – „Þessi ríkis­stjórn er galin“

„Bara í mínu litla fyr­ir­­tæki erum við að tala um að minnsta kosti 20 millj­óna tekju­tap,“ segir Rafn Valur Al­freðs­son, leigu­taki Mið­fjarðar­ár. Rafn er afar ó­hress með þá á­kvörðun stjórn­valda að skikka ferða­menn í tvö­falda sýna­töku og sótt­kví þar til niður­staða úr seinni sýna­tökunni liggur fyrir.

Morgun­blaðið vakti at­hygli á Face­book-færslu Rafns en í henni sendir hann stjórn­völdum tóninn. Hann segir að hann hafi þurft að af­bóka 52 stangir af er­lendum veiði­mönnum það sem eftir lifir tíma­bils í Mið­fjarðar­á. Segir hann að þetta hafi hann þurft að gera út af ó­skiljan­legri á­kvörðun mis­vitrar ríkis­stjórnar.

„Í raun líður mér eins og ég hafi al­veg verið að klára mara­þon­hlaup og svo hafi ein­hver vit­­leys­ing­ur komið og sparkað mig niður 500 metra frá enda­­marki,“ segir í færslunni sem birt er á vef Morgun­blaðsins.

Hann segir að í allt sumar hafi hann verið með fullt hús af fólki, einkum er­lenda veiði­menn sem eru til­búnir að leggja mikið á sig til að veiða í ánni á hverju sumri. Flestir séu búnir að fara í próf vegna kórónu­veirunnar og fari svo í annað próf þegar þeir koma til Ís­lands. Þeir ættu því að vera eins öruggir ferða­menn og hægt er að fá.

„Ótti lé­­legra stjórn­­mála­manna við að gera mis­tök er að fara að verða okk­ur dýr,“ segir hann og nefnir 20 milljóna tekju­tap í hans fyrir­tæki. Þá nefnir hann tekju­missi fyrir leið­sögu­menn, mat­reiðslu­­menn og starfs­­fólk í veiði­húsi. „Þá er ó­talið aðrar af­­leidd­ar tekj­ur t.d. bíl­­stjóra, hót­el, Icelandair og veit­inga­staðir.“

Rafn segir að hann myndi skilja þessa á­kvörðun ef það væru 5-10 manns á sjúkra­húsi og annað eins á gjör­gæslu og til­finningin væri sú að við værum að missa tökin á út­breiðslu veirunnar. Bendir hann á að alla síðustu viku hafi 28 til­felli greinst, einn sé á sjúkra­húsi og enginn á gjör­gæslu.

„Þessi rík­is­­stjórn er gal­in og á­kvörðunin er tek­in af fólki sem fær út­borgað hvort sem hingað koma ferða­menn eða ekki, hvort sem það veiðist loðna eða ekki, sama hvað ger­ist þá borg­um við laun­in þeirra. Þetta lið er líka með ein bestu líf­eyr­is­rétt­indi sem þekk­ist í þess­ari ver­öld og við borg­um.“