Alda Svanhvít Gísladóttir er vægast sagt ekki sátt við flugfélagið Play. Í samtali við Fréttablaðið segir hún frá því að tvær ferðatöskur hafi týnst og að Play ætli ekki að bæta þeim töskurnar.
Alda var ásamt manni sínum á Tenerife í mánuð og hafði því tvær stórar töskur í för með sér. Hún og maður hennar ferðuðust með öðru pari upp á flugvöll og skráðu töskurnar sínar inn á sama tíma og þau, nema hvað að þau fengu ekki töskumiða, líkt og hitt parið.
Þau hjónin eru vön að ferðast um allan heim án vandkvæða, að sögn Öldu og því bjuggust þau ekki við neinum vandræðum, enda um beint flug frá Tenerife til Reykjavíkur um að ræða.
En í Keflavík var töskurnar hvergi að finna. „Við tilkynnum strax að það séu engar töskur,“ segir Alda við Fréttablaðið og bætir við: „Í heilan mánuð ætluðu þau að finna þær.“
Alda segist hafa fengið um þrjátíu tölvupósta síðasta mánuðinn. Í tölvupóstinum segjast fulltrúar Play trúa þeim hjónum og að allt verði gert til að finna töskurnar.
Síðan fá þau hjón skilaboð um að þar sem töskurnar hafi aldrei verið innritaðar sé ekki hægt að leita að þeim og því fá þau töskurnar ekki bættar. „Síðasta boð sem við fáum frá þeim er 150 þúsund króna inneign í flug sem sárabætur vegna þess hversu lengi þetta hefur dregist,“ segir Alda.
Alda segist sjálf hafa reiknað hversu mikil verðmæti hafi verið í töskunni. „Þetta er 560 þúsund krónur sem ég taldi saman í töskunni,“ segir hún.
Næsta skref hjá þeim hjónum er að fá sér lögfræðing „vegna þess að við erum orðin svo pirruð yfir þessu og hvernig er komið fram við okkur. Þetta er bara ömurlegt,“ segir Alda.
