„Við erum með aðgang að nægri fjármögnun til að fara í loftið,“ segir Skúli Skúlason, stjórnarformaður Play, í samtali við Viðskiptablaðið í dag. Hann segir að ef COVID-19 faraldurinn þróast í jákvæða átt sé stefnt að því að hefja áætlunarflug í október næstkomandi.
Skúli segir ekki ljóst hvort byrjað verði með eina eða fleiri vélar og bendir hann á að mikill tími fari í viðræður við flugvélaleigusala, bæði um kjör og tegundir véla og hvernig þær passa inn í samsetningu á framtíðarflota félagsins. Aðgangur að vélum sé þó góður um þessar mundir.
„Hæglega gætu menn verið komnir með 6 til 8 vélar strax í haust og 10 til 15 vélar næsta sumar ef þyrfti. Landslagið á flugvélaleigumarkaði hefur breyst mjög mikið á síðastliðnum tveimur eða þremur mánuðum og kjörin allt önnur í dag en bara síðustu áramót, enda fleiri þúsund vélar orðnar heimilislausar,“ segir hann.
