„Það hefur verið mikið að gera,“ segir Pétur Guðmann Guðmannsson, réttarmeinafræðingur á Landspítalanum, í viðtali í nýjasta tölublaði Læknablaðsins.
Í viðtalinu fer Pétur um víðan völl en það sem vekur einna mesta athygli er sú staðreynd að hann hefur krufið nærri 190 lík vegna óútskýrðra dauðsfalla hér á landi á árinu.
Í viðtalinu kemur fram að hann kryfji aðeins þá sem látast skyndilega; verða fyrir slysi, láta lífið fyrir eigin hendi eða eru myrt. Sum sé óvænt dauðsföll og engin sjúkdómssaga. Hann segir að 8 til 10 prósent þeirra sem deyja fari í réttarkrufningu.
„Um 200 á ári, stöðug tala, en í ár eru þau rétt að verða 190 og þrír og hálfur mánuður eftir af árinu,“ segir hann og bætir við að hans tilfinning sé sú að sjálfsvígum fjölgi.
Í umfjöllun Læknablaðsins kemur fram að Embætti landlæknis hafi ekki birt bráðabirgðatölur úr dánarmeinaskrá í ár þar sem skýrslugerð vegna andlátanna hefur dregist vegna álagsins. Segir Pétur að hann eigi ólokið skýrslum vegna tuga þeirra 186 krufninga sem hann hefur framkvæmt það sem af er ári.
Pétur hefur sinnt starfinu einn en í viðtalinu kemur fram að hann fái brátt liðsauka þegar Snjólaug Níelsdóttir, sem er sérmenntuð í réttarmeinafræði, kemur og kryfur með honum líkin.
Pétur kom heim frá Svíþjóð fyrir um tveimur árum, en þar í landi stundaði hann sérnám hjá Rättsmedicinalverket í Linköping. Hann segir að aðstaðan í Svíþjóð sé önnur og betri en á Íslandi.
„Maður hefur sama fræðilega og faglega metnað. Hér er maður einn að sýsla í öllu en í Svíþjóð er fólk sem heldur utan um gæðahandbækur og skráningar og annað sem tilheyrir utanumhaldinu,“ segir hann meðal annars en viðtalið má lesa í heild sinni á vef Læknablaðsins.
