Pálmi Gestsson, einn ástsælasti leikari þjóðarinnar, er gestur Björns Þorlákssonar í þættinum Frísk eftir fimmtugt sem sýndur er á Hringbraut.
Í þættinum segir Pálmi meðal annars frá því að hann fasti reglulega og það hafi reynst honum einkar vel.
„Það er sagt að meðalmaður, frekar grannur, hafi 100 þúsund auka hitaeiningar í tanknum sem hann getur lifað á ef hann nær ekki í mat,“ segir Pálmi meðal annars.
Hann kveðst hafa prófað að fasta einn dag og athuga hvernig honum liði, enda ekki víst að það henti öllum að fasta lengi í einu. Það gekk hins vegar vel svo úr varð að hann ákvað að prófa tvo daga og svo þrjá daga.
„Og þá fór mér að líða mjög vel. Öll hugsun verður skýrari. Þú verður einbeittari og þú verður orkumeiri. En svo er þetta líka vísindalega sannað,“ segir Pálmi og bætir við að líkaminn fari í „frystikistuna“ eftir ákveðinn tíma í föstu og fari að vinna orku úr öðru en glúkósa sem fer hratt út í blóðrásina.
„Eftir ákveðinn tíma, 16 tíma eða svo – það er ekki langur tími – þá gerist eitthvað sem kallast sjálfsát og ég held það hafi verið 2016 sem vísindamaður fékk nóbelsverðlaunin fyrir að uppgötva þetta dæmi,“ segir Pálmi meðal annars og bætir við að í þessu ástandi fari líkaminn að líta í kringum sig og taka til, ef svo má segja.
Fullyrt sé að langtímaföstur geti unnið gegn krabbameini eða krabbameinsfrumum sem eru byrjaðar að myndast. Þá fari líkaminn að framleiða heilafrumur. Sló Pálmi á létta strengi í viðtalinu við Björn og sagðist hafa orðið var við það að hann hefði næstum því náð meðalgreind með því að fasta.
Pálmi segir að þetta sé í raun allt saman mjög rökrétt enda mannskepnan ekki alltaf lifað í vellystingum þar sem næsta máltíð er í nokkurra skrefa fjarlægð.
„Þegar við vorum í hellunum, þegar menn fengu ekki að borða þá lögðust þeir ekki niður og dóu. Þá fyrst urðu þeir einbeittir og fengu innspýtingu í vöðvana og voru á tánum.“
