Páll Óskar Hjálmtýsson, einn ástsælasti tónlistarmaður þjóðarinnar, gefur samfélagsmiðlum ekki háa einkunn en sjálfur notar hann þá einungis vegna vinnu sinnar en ekki til að deila einkalífi sínu.
Páll Óskar var í athyglisverðu viðtali í Mannlega þættinum á Rás 1 þar sem hann ræddi meðal annars um samfélagsmiðla. „Ég sit stundum fyrir framan tölvuskjáinn og fylgist með fólki hnakkrífast, skítkast í allar áttir, allir hafa rétt fyrir sér og allir eru að kafna úr skoðunum. Það eina sem gerist hjá mér er að axlirnar sökkva og ég missi trúna á mannkyninu.“
Páll Óskar segir að samfélagsmiðlar séu ekki eitthvað sem börn og unglingar ættu að sækjast í. „Þeim líður ekki vel á Instagram þar sem allir eru með stór brjóst og fullkominn rass og kröfurnar eru orðnar gígantískar,“ segir hann og bætir við að svokallaðir filterar séu settir á myndirnar sem við sjáum áður en þær eru settar inn.
Sem fyrr segir notar Páll Óskar samfélagsmiðla fyrst og fremst vegna vinnu sinnar, en þegar hann setur eitthvað inn verður hann heltekinn af því hversu margir læka færslurnar. Segist hann verða læksjúkur og dagarnir fari í þetta. Hann segist vona að næsta kynslóð, þau börn sem nú eru að fæðast, sjái í gegnum þetta og snúi bakinu við þessum miðlum.
„Ég held að það verði kynslóðin sem gefur samfélagsmiðlum fingurinn. Þetta er kynslóðin sem á eftir að ranka við sér og fatta að læktakkinn er lygi. Þetta er allt lygi. Þetta er allt performans.“
Viðtalið við Pál Óskar má nálgast hér.
