Kosningar til forseta Íslands fara fram laugardaginn 27. júní en þeir Guðni Th. Jóhannesson og Guðmundur Franklín Jónsson keppast þar um að fá að sitja sem forseti næstu fjögur árin.
Fjöldi fólks hefur hvatt fólk til að kjósa á kjördag en stuðningsmenn Guðna hafa hleypt af stað átaki til að styðja sitjandi forseta.
Meðal þeirra sem hafa lýst yfir stuðningi við Guðna eru stórsöngvarinn Páll Óskar Hjálmtýsson og landsliðsmaðurinn Rúrik Gíslason en þeir hafa báðir birt færslur á Instagram til að hvetja fólk til að kjósa undir myllumerkjunum #kjósumöll og #ÉgkýsGuðna.
Sjá einnig: Ný könnun: Guðni með yfirburði – Stuðningsmenn Donald Trump styðja Guðmund
„Það eru forsetakosningar á Íslandi og kjördagur er 27. júní en ég er bara mættur strax hingað í Laugardalinn að kjósa utan kjörfundar,“ segir Páll Óskar í myndbandi sem hann birtir á Instagram. „Ég vil kjósa út af því að ég ber virðingu fyrir kosningarétti mínum fyrir það fyrsta, og ég vil líka bera virðingu fyrir forsetaembættinu sem slíku.“
„Ef þú mætir ekki á kjörstað og kýst nú þá gerir það bara einhver annar fyrir þig og jafnvel kýs eitthvað sem þú vilt ekki. Ég kýs Guðna Th., #kjósum öll!“
Þá birti Rúrik mynd af sér með Guðna og Elizu. „Kjördagur er 27. júní! Munum að kjósa,“ skrifar Rúrik við færsluna og með fylgja myllumerkin #kjósumöll og #égkýsguðna. Alls hafa rúmlega átján þúsund manns líkað við færsluna en Rúrik er með 831 þúsund fylgjendur.
