„Þessu þarf sannarlega að breyta og það strax,“ segir Ottó Sverrisson, sjálfstæður atvinnurekandi, í grein sem birtist á vef Vísis í morgun. Í grein sinni skrifar Ottó um þá galla sem eru á meðlagskerfinu hér á landi.
Ottó segir að meðlagið sem slíkt sé hið besta mál, enda eitthvað sem foreldrar barna borga hvort öðru til að standa undir daglegum þörfum barns eftir sambúðarslit. Hann segir að eftir að úrskurður komust úr öndum sýslumanns og dómsmálaráðherra hafi komist jafnvægi á þetta, en betur megi ef duga skal.
„Það sem ég furða mig á í dag er þegar fólk sem hefur ákveðið að slíta samvistum og koma til sýslumanns með tilbúna samninga um forsjá / lögheimili barns, umgengni við foreldra og hvað þau telji sanngjarnar greiðslur í meðlag miðað við viðveru þá segir sýslumaður STOPP,“ segir Ottó í grein sinni.
Bendir hann á að fulltrúar hans samþykki lögheimili og þá umgengni sem foreldrar hafa samið um en ekki meðlagið. Að þeirra sögn sé kveðið á um í lögum að ekki megi samþykkja skilnað nema að sá aðili sem ekki hefur forsjá eða lögheimili skuldbindi sig til að borga fullt meðlag og skrifi undir samning þess efnis.
„Fulltrúar sýslumanns upplýsa að samningurinn sé ekki sendur til innheimtu svo foreldrar geti ef þeir vilja borgað beint sín á milli samkvæmt samkomulaginu,“ segir Ottó og heldur áfram:
„Eftir situr, það foreldri sem ekki hefur lögheimili barnsins er búið að skuldbinda sig til að greiða hefðbundið meðlag til 18 ára aldurs barns og trompar sá samningur allt annað samkomulag fari hann fyrir dómstóla.“
Ottó bendir á tilbúið dæmi máli sínu til stuðnings og gefur sér að foreldrar séu búnir að gera samkomulag um jafna umgengni og hvorgt greiði meðlag því barnið er til jafns hjá þeim.
„Eftir 10 ár gerir þú eitthvað sem fyrrverandi hugnast ekki, foreldrið sem er með lögheimili barnsins vantar nýja íbúð eða er í fjárhagslegum vandræðum. Jú, við skulum krefjast meðlags 10 ár aftur í tímann sem gera 4,2 milljónir fyrir utan vexti. Samningurinn sem annar aðilinn var neyddur til að skrifa undir hjá sýslumanni ( bara af því lögin er þannig ) verður sá samningurinn sem dómari þarf að fara eftir, nokkuð borðliggjandi hvernig sá dómur fer,“ segir hann og bætir við að hér sé um skuldagildru að ræða.
„Virðist vera að núverandi dómsmálaráðherra og aðrir sem gegnt hafa embættinu síðustu árin hafi lítin áhuga á svona málum enda eru forsjár, umgengni og meðlagsmál málaflokkar sem alltaf hafa verið gríðarlega fjandsamlegir karlmönnum ef maður lítur til dóma eða úrskurða undangengina ára. Þessu þarf sannarlega að breyta og það strax.“
