Óttar Guðmundsson, geðlæknir og pistlahöfundur Fréttablaðsins segir í bakþönkum blaðsins í dag að menn hafi lengi reynt að skapa stemningu á torgum í Reykjavík, en veðrið ráði mestu um og því endist fólk ekki til lengdar að sitja úti á torgi með kaffibolla í hraglanda.
„Íslendingar hafa lengi dáðst að götumenningu á torgum og iðandi mannlífi í erlendum stórborgum. Fólk situr á útikaffihúsum eða bekkjum og nýtur sólar og veðurblíðu,“ segir Óttar og bætir við að Íslendingar hafi lengi reynt að skapa slíka stemningu í Reykjavík.
„Lækjartorg var stundum fjölsótt en aðallega vegna þess að strætisvagnar borgarinnar höfðu þar viðdvöl,“ bendir Óttar á og segir að aldrei hafi tekist að koma upp kaffihúsastemningu á íslenskum torgum.
Það sé einfaldlega veðrinu að kenna. „Stóran hluta ársins ganga lægðir yfir landið með tilheyrandi suðaustanátt og rigningu. Fólk endist ekki til lengdar að sitja úti á torgi með kaffibolla í hraglanda,“ segir Óttar.
Hann segir það vera synd að skipulagsfræðingar borgarinnar hafi ekki áttað sig á þessu. „Verið er að byggja fjölmörg torg úti um alla borg þar sem reiknað er með fjölskrúðugu mannlífi.“
„Nú á að byggja nýtt torg við Hlemm sem bætist við Hjartatorgið, Hörputorgið, Káratorgið, Vitatorgið og Óðinstorgið sem öll eru í póstnúmeri 101. Kaffiþyrstir Reykvíkingar og ferðamenn hafa næg tækifæri til að njóta útimarkaða, tónlistarmanna og iðandi mannlífs,“ segir hann.
Óttar segir einkabílnum vera úthýst, „enda eigi gestir að ganga eða hjóla léttklæddir milli torga.“
Þá segir Óttar torgin vera auð og tóm öllu jöfnu og að hvergi hafi tekist að skapa einhverja útistemningu eins og skipuleggjendur borgarinnar þekkja frá útlöndum. „Íslenska veðráttan lætur ekki að sér hæða,“ segir hann.
„Nú þyrfti borgarráð að álykta að veðurfar verði að breytast á Íslandi tafarlaust svo að hægt sé að spranga um nýju torgin á stuttbuxum með bros á vör. Það er óþolandi að þessi duttlungafulla veðrátta skuli gera háleita skipulagningu að engu,“ segir Óttar.
