Fyrir skömmu vöktu auglýsingar um störf í stjórnsýslunni mikla athygli. Þar var lýst eftir ungum lögfræðingum sem hefðu bandarísku sjónvarpsþáttapersónurnar Ally McBeal og Harvey Specter sem fyrirmyndir.
Óttar Guðmundsson geðlæknir segir í bakþönkum í Fréttablaðinu í dag að það sé gaman þegar ráðuneyti fari ótroðnar slóðir með þessum hætti en að fremur ætti að finna lögfræðinga sem sæktu sér fyrirmyndir í Njálu.
„Lýst er eftir lögfræðingi sem vill líkjast Merði Valgarðssyni og Þórhalli Ásgrímssyni í Brennu-Njálssögu. Viðkomandi þarf að vera klækjóttur og kunna að skara eld að eigin köku. Við lýsum eftir silkitungu á lopasokkum.“ Með slíkri auglýsingu væri stjórnsýslan að tengja nútímann inn í sagnaarfinn.
Hann stingur upp á fleiri hugmyndum fyrir aðrar stöður innan stjórnsýslunnar.
„Þjóðminjavörður ætti að hafa Skallagrím á Borg sem fyrirmynd enda var hann fastheldinn á gamalt drasl. Seðlabankastjóri mætti líkjast Agli afa mínum Skallgrímssyni sem gróf sjóði sína í jörð,“ skrifar hann.
„Ráðuneytið vill breyta ímynd sinni. Þau Harvey og Ally eru útlits eins og dúkkurnar Barbie og Ken. Þau eru bæði með BMI undir 19 með fullkomnar tennur og vel hirt hár og taka sig sérlega vel út á mynd með ráðherrum Sjálfstæðisflokks.
Auðvitað á ekki að rýna í prófskírteini og ferilskrá heldur skoða hversu mjög umsækjandinn líkist glæsilegum sjónvarpsstjörnum. Markmiðið er að fylla ráðuneytin af ungu og fallegu fólki sem hvorki eldist né fitnar svo að hópmyndin verði alltaf jafn glæsileg.“
