Óhætt er að segja að hugur Íslendinga hafi verið hjá aðstandendum ungu pólsku fjölskyldunnar sem lenti í skelfilegu umferðarslysi í Skötufirði á laugardag. Tvennt lést í slysinu; Kamila Majewska og sonur hennar, Mikolaj Majewski sem var á öðru aldursári.
Eins og Hringbraut greindi frá í gærmorgun var blásið til söfnunar fyrir aðstandendur fjölskyldunnar sem búsettir eru í Póllandi. Kom fram að andvirði söfnunarinnar myndi renna til að koma nánustu fjölskyldu parsins til landsins til að veita Tomek Majewski, eiginmanni Kamilu og föður Mikolaj, stuðning á þessum erfiðu tímum.
Á pólskri vefsíðu sem var sett upp vegna söfnunarinnar var stefnt var að því að safna 60 þúsund slots, sem eru um tvær milljónir króna, en skemmst er að segja frá því að söfnuninni var hætt þegar upphæðin var komin yfir 100 þúsund slots, rúmar þrjár milljónir króna.
Á Facebook deildu einnig fjölmargir landskunnir Íslendingar upplýsingum um söfnun til styrktar föðurnum. Þannig deildu til dæmis margir færslu Bergþórs Pálssonar, tónlistarmanns og skólastjóra, á Facebook í gærkvöldi. Í færslunni sagði hann:
„Margt smátt gerir eitt stórt. Stofnaður hefur verið stuðningsreikningur fyrir unga manninn sem missti eiginkonu sína og barn á öðru ári í hörmulegu slysi í Skötufirði.
Reikningsnúmer 0123-15-021551 og kennitala 031289-4089.“
Margir svöruðu kalli Bergþórs og lögðu söfnuninni lið, til dæmis Ingibjörg Sólrún Gísladóttir, fyrrverandi ráðherra, sem sagði: „Búin. Mikill er harmur unga mannsins sem eftir lifir. Sendi honum heilandi strauma.“ Meðal annarra sem lögðu söfnuninni lið má nefna tónlistarmennina Friðrik Ómar Hjörleifsson og Jógvan Hansen.
