Össur Skarphéðinsson, fyrrum ráðherra, lætur Knattspyrnusamband Íslands heyra það í nýjum pistli á Facebook.
„Fifa er alveg að skíta á sig, og KSÍ líka. Hvernig kemst Fifa – líklega spilltustu alþjóðasamtök sem séð hafa dagsins ljós - upp með að styðja katarísk yfirvöld í skipulögðum mannréttindabrotum? Hinsegin fólk er hundelt í Katar í skjóli laga,“ segir Össur.
„Á sama tíma kemst Fifa upp með að setja sérstakar reglur um að leikmenn sem vilja bera regnbogamerki í Katar til stuðnings samkynhneigðum fái gult spjald. Fifa tekur þannig þátt í mannréttindabrotum katarískra stjórnvalda. Hvernig gerðist það? Vissu aðildarþjóðirnar ekkert af því? Á meðan KSÍ og norræn knattspyrnusamtök mótmæla þessu ekki þannig að heimurinn taki eftir eru þau með óbeinum hætti að taka þátt í þessum mannréttindabrotum. Formaður KSÍ er stödd í Katar og segist vera þar á fundum með Fifa. Það er siðferðileg skylda hennar að beita sér fyrir að Ísland, eitt eða með öðrum, taki þetta mál upp og a.m.k. láti í ljós andstöðu sína – og láti heiminn vita,“ skrifar Össur að lokum.
