Óskar Steinn Ómarsson, fyrrverandi ritari Samfylkingarinnar, hefur birt færslur á samfélagsmiðlinum Facebook um söluna á Íslandsbanka sem hafa vakið mikla athygli.
Þar tekur hann saman þrjá einstaklinga sem græddu á nýliðinni sölu ríkisins á hlut í Íslandsbanka sem hefur heldur betur reynst umdeild. Einstaklingarnir þrír eru þau Þorsteinn Már Baldvinsson, forstjóri Samherja, Guðbjörg Matthíasdóttir, útgerðarkona í Vestmannaeyjum og Pálmi Haraldsson, betur þekktur sem Pálmi í Fons. Íslendingum vel kunnugir.
Óskar skrifar:
„Þorsteinn Már Baldvinsson, forstjóri Samherja, er búinn að selja hlutabréfin sem hann keypti í Íslandsbanka á afsláttarkjörum. Miðað við gengi bréfa í bankanum náði hann að græða á bilinu 25,2 og 32,5 milljónir á kaupunum. Það tæki manneskju á lágmarkslaunum um sjö ár að vinna fyrir þeirri upphæð. Til hamingju öll.
Risastór sigur fyrir VG: Guðbjörg Matthíasdóttir, útgerðarkona úr Vestmannaeyjum, er búin að selja hlutabréfin sem hún keypti í lokaða Íslandsbankaútboðinu. Hún náði að græða 40 til 51 milljón á viðskiptunum. 12-föld árslaun láglaunafólks. Þvílíkur árangur.
Pálmi Haraldsson, eða Pálmi í Fons, er einn þeirra heppnu sem fengu símtal. Hann er nú búinn að selja sinn hlut og græða 19-25 milljónir á viðskiptunum. Þvílíkt ævintýri, þvílík snilld hjá ríkisstjórn Katrínar Jakobsdóttur hvað getur maður sagt annað en TAKK“
