Segja má að skiptar skoðanir séu á meðal fólks um það hvort eðlilegt sé að borga 500 krónur fyrir andlitsgrímu þegar þjónusta er keypt á stöðum þar sem þess er krafist að notuð sé gríma.
Kona ein sagði frá því í fjölmennum Facebook-hópi hér á landi, þar sem flest sem við kemur kórónuveirunni er til umræðu, að hún hafi verið rukkuð um þessa upphæð þegar hún fór í klippingu. Konan kveðst hafa gleymt að taka með sér grímu en verið boðið að kaupa eina á stofunni fyrir 500 krónur.
„Mér finnst að stofurnar eigi að sjá viðskiptavinum fyrir grímum fyrst við erum að skipta við þær á þessum tímum, þær þurfa þá ekki að loka á meðan. Fyrir utan svo það að klipping sem tók 20 mínútur kostaði 9000 kr.,“ segir konan í færslunni en óhætt er að segja að skiptar skoðanir séu um innleggið.
Sú athugasemd sem hefur fengið hvað flest læk, eða tæplega 70 talsins, er á þá leið að það sé á hennar ábyrgð að vera með grímu en ekki hárgreiðslustofunnar. Konan sem setti upphaflegt innlegg inn bendir þá á að það sé hreint okur að rukka 500 krónur fyrir grímuna. Bent er á að hægt sé að kaupa þær á allt að tífalt lægri upphæð í stykkjatali.
Þá segir konan að það myndi flokkast undir góða þjónustu að hárgreiðslustofur myndu útvega viðskiptavinum grímur og selja þær svo á kostnaðarverði.
Óhætt er að segja að færslan hafi fengið misjöfn viðbrögð og fær konan nokkur vel valin orð frá fólki í þræðinum. Það sé á hennar ábyrgð að koma með grímu með sér og það sé ekki hægt að ætlast til þess að hárgreiðslustofan hlaupi undir bagga með öllum kúnnum.
Konan segir að henni sé alveg sama um allt skítkast: „Okur er okur,“ segir hún.
Að minnsta kosti tveir starfsmenn á hárgreiðslustofum blanda sér í umræðuna og segja þeir að grímurnar séu seldar á viðkomandi stofum á annars vegar 150 krónur og hins vegar 100 krónur.
Hvað segja lesendur, er of mikið að rukka 500 krónur eða ættu viðskiptavinir að gjöra svo vel og muna eftir því að koma með grímu með sér?
