„Helgi Björns má alveg vera á tánum gagnvart þessu teymi,“ segir Orri Páll Ormarsson, blaðamaður á Morgunblaðinu, í sjónvarpspistli sem birtist í blaði dagsins. Þar skrifar Orri um tvo af vinsælustu tónlistarmönnum þjóðarinnar um þessar mundir, Helga Björns og Ingó veðurguð.
„Sjaldan höfum við, pestþvæld þjóðin, haft eins mikla þörf fyrir góða afþreyingu og á þessum síðustu og verstu tímum. Stöð 2 brást nýlega við því og teflir nú fram Ingó veðurguði og vinum hans á föstudagskvöldum,“ segir Orri Páll og bætir við að þeir þættir, Í kvöld er gigg, hafi komið skemmtilega á óvart. Óhætt sé að segja að Ingó sé á góðri siglingu, alþýðlegur og sérvitur sem hann er.
„Sérstaklega hafði ég gaman af síðasta þætti, þar sem rokktröllin Stebbi Jak og Palli Rós (ég tala bara eins og ég þekki þessa menn, sem ég geri ekki, þetta lítur bara svo vel út) sungu úr sér lungun og Stefanía Svavars, enn eitt söngundrið úr Mosfellsbænum, gaf þeim ekki þumlung eftir. Eftir þá keyrslu var hnausþykk móða á rúðunum í sjónvarpsálmu sveitaseturs míns,“ segir Orri.
Helgi Björnsson stal senunni þegar COVID-19-faraldurinn fór á flug og hann er kominn aftur á skjáinn en nú með örlítið breyttu sniði. Orri segir:
„Helgi Björns má alveg vera á tánum gagnvart þessu teymi. Hann fór rólega af stað í nýju setti, sem er hvergi nærri eins heimilislegt og það gamla, en Eyþór Ingi skaut honum aftur á sporbaug um jörðu í öðrum þættinum.“
