Hafnfirðingurinn Orri Björnsson, Sjálfstæðismaður og forstjóri Algalíf, gerir staksteina Morgunblaðsins að umtalsefni á Facebook-síðu sinni.
Eins og Hringbraut greindi frá í morgun eru staksteinar dagsins með undarlegra móti en þar fjallar höfundur um kórónuveiruna sem veldur COVID-19 og kýs að kalla hana Wuhan-veiruna. Látið er að því liggja að hún hafi orðið til á rannsóknarstofu og að Anthony Fauci, helsti sérfræðingur Bandaríkjanna um sóttvarnir, hafi komið þar að.
Orri er ósáttur við skrifin og segir:
„Þarf ekki að fara að sprauta honum? Að flensan drepi tugmilljónir árlega??? Og annað eftir því. Hvar eru bullmörkin í ritstjórnarefni? Hversu mikið má rugla og þrugla og hræða fólk og afvegaleiða? Þessu verður að fara að ljúka, ANNARS segi ég upp áskriftinni í annað sinn á ævinni!“
Athygli vekur að Hannes Hólmsteinn Gissurarson, stjórnmálafræðiprófessor við Háskóla Íslands og góðvinur Davíðs Oddssonar, ritstjóra Moggans, kemur staksteinahöfundi til varnar.
„Þetta er útúrsnúningur hjá þér. Það segir hvergi í greininni, að milljónatugir deyi árlega úr flensunni. Milljónatugir hafa dáið úr flensunni á síðustu áratugum, því að samkvæmt mati Alþjóðaheilbrigðisstofnunarinnar til dæmis deyr hátt í milljón árlega úr henni um allan heim.“
Þór Saari, fyrrverandi þingmaður, blandar sér einnig í umræðuna og segir: „Það sem er einnig skrítið við Moggan er að það vinnur líka heilsteypt og heiðarlegt fólk þar. Hvernig er það hægt?“
Fleiri hafa gagnrýnt skrifin. Þar á meðal Þórður Snær Júlíusson, ritstjóri Kjarnans. Hann segir á Twitter-síðu sinni og birtir skjáskot af staksteinum dagsins:
„Formaður allsherjar- og menntamálanefndar kallaði þennan miðil hér að neðan meira alvöru en aðra - frumframleiðslufjölmiðil á meðan aðrir minni séu eitthvað óskilgreint annað og verra - úr pontu Alþingis í vikunni. Þess vegna ætti þessi miðill skilið meiri pening úr ríkissjóði.“
Formaður allsherjar- og menntamálanefndar kallaði þennan miðil hér að neðan meira alvöru en aðra - frumframleiðslufjölmiðil á meðan aðrir minni séu eitthvað óskilgreint annað og verra - úr pontu Alþingis í vikunni. Þess vegna ætti þessi miðill skilið meiri pening úr ríkissjóði. pic.twitter.com/yHgaLV3bUv
— Þórður S. Júlíusson (@thordursnaer) May 20, 2021
