„Það má brosa að þessari einfeldni, en svona virkar heilaþvottur,“ segir Örn Svavarsson, stofnandi Heilsuhússins og fyrrverandi vottur Jehóva, í aðsendri grein í Morgunblaðinu í dag.
Þar svarar Örn grein sem Jörgen Pedersen, stjórnarformaður trúfélags Votta Jehóva í Noregi, skrifaði og fékk birta í Morgunblaðinu á dögunum. Í greininni sagði Jörgen meðal annars að fjölmiðlar á Íslandi hefðu ítrekað borið fram alvarlegar og ærumeiðandi ásakanir á hendur Vottum Jehóva.
„Þau ósannindi sem andvaralausir fjölmiðlar enduróma eiga upptök sín hjá fólki sem segist hafa tilheyrt söfnuðinum. Þessir einstaklingar hafa ekki alltaf það markmið að fara satt og rétt með staðreyndir,“ sagði Jörgen meðal annars.
Órökstuddar dylgjur
Örn segir að í grein sinni haldi Jörgen fram órökstuddum dylgjum um að útskúfað fólk úr söfnuðinum ljúgi til um kenningar safnaðarins og samskipti sín við hann.
„Þar sem ég tók þátt í umræðunni um Vottana í kjölfar sjónvarpsviðtala á síðasta ári og tjáði mig um mína reynslu, mun ég vera í hópi þeirra sem stjórnarformaður norskra Votta Jehóva dylgjar um. Því vil ég árétta að ég var alinn upp sem vottur Jehóva frá blautu barnsbeini af mjög trúheitri móður. Fyrir ákafa hvatningu hennar og frekari örvun annarra votta lét ég skírast aðeins tíu ára gamall, enda höndluðum við sannleikann og vegur framtíðar blasti ljóslifandi við okkur, Harmageddon og eilíf jarðnesk paradís þar handan við,“ segir Örn meðal annars og stiklar svo á stóru um þær kenningar sem lifað var eftir og ítrekaðar heimsendaspár.
Hann gagnrýnir þau orð Jörgens í greininni þess efnis að vottar Jehóva beri mikla virðingu fyrir lífinu og mannlegri reisn og að trúarkenningarkenningar þeirra einkennist af ríkulegu valfrelsi og frelsti til að taka eigin ákvarðanir.
„...nú segi ég úps!“
„Og nú segi ég úps! Jafnt ég sjálfur sem og fjöldi fyrrverandi votta sem ég þekki hafa svo sannarlega ekki notið þessa „ríkulega valfrelsis“, heldur hefur okkur verið útskúfað. Vottur sem missir trúna á guðinn Jehóva og félag hans, eða velur að lifa sínu lífi með öðrum hætti en félagið býður, er rekinn. Fólk er smánað. Útskúfun þar sem öllu þess fólki, æskuvinum jafnt sem frændfólki, nánustu fjölskyldu, jafnvel systkinum, foreldrum og börnum er bannað að hafa við það nokkurt samneyti, er andstyggilegt form refsingar, andlegt ofbeldi í sinni verstu mynd. Þegar heilt samfélag tekur sig saman um að leggja fæð á einn einstakling, þegar heill söfnuður fær fyrirmæli frá sínum andlegu leiðtogum um að hunsa einn úr sínum hópi með öllu, virða hann ekki viðlits frekar en að hann hefði aldrei verið til, þá eru slíkar öfgafullar aðgerðir einelti á hæsta stigi og hrópleg brot á mannréttindum.“
Örn heldur áfram og segir að þetta sé sérdeilis nýstárleg „virðing fyrir mannlegri reisn“ og „ríkulegu valfrelsi og frelsi til að taka eigin ákvarðanir“.
„Þú mátt sannarlega taka þína eigin ákvörðun, en sé hún ekki okkur að skapi, þá verður þú rekinn og þér útskúfað úr okkar samfélagi. Talsmaðurinn norski talar um að verið sé að „að spilla orðstír trúarlegra minnihlutahópa með fordómum og ósannindum“. Ég leyfi mér að fullyrða að það sem ég set hér niður á blað sé öllu nær sannleikanum, svona eins og við þekkjum hann í daglegu lífi, heldur en Harmageddon-spádómurinn sem hinn ameríski trúflokkur fékk meldingu um frá guðinum Jehóva og taldi okkur trú um að riði yfir heiminn árið 1975. Þetta var okkar bjargfasta trú á árunum áður en spádómurinn brást. Það má brosa að þessari einfeldni, en svona virkar heilaþvottur.“
Örn segist að lokum taka heilshugar undir eftirfarandi orð Jörgens í greininni:
„Óskandi er að Ísland beiti sér fyrir því að allir landsmenn fái að njóta lýðræðis, umburðarlyndis og virðingar.“