Heiða Magnúsdóttir, eigandi Ásmundarsalar, segir að Ásmundarsalarmálið sem kom upp á jólunum í fyrra hafi svolítið rústað jólunum það árið. Heiða ræddi um salinn og atvikið í fyrra við Kjarnann.
Eins og frægt er orðið stöðvaði lögregla sölusýningu í Ásmundarsal á Þorláksmessu í fyrra og lét það koma fram í dagbók lögreglu að „hæstvirtur ráðherra“ hefði verið á staðnum og annar hefði kallað lögreglumenn „nasista“. Kom svo í ljós að um var að ræða Bjarna Benediktsson fjármála- og efnahagsráðherra.
Heiða segir að það verði opið til kl. 22 í Ásmundarsal á Þorláksmessu næsta fimmtudag. Málið hafi verið allt hið leiðinlegasta.
„Þetta eitt það leiðinlegasta sem ég hef lent í, þetta rústaði svolítið jólunum í fyrra, það verður bara að segjast eins og er,“ sagði hún.
„En eftir allan þennan tíma og allar þessar rannsóknir og yfirheyrslur sem fóru fram þá fáum við sekt fyrir það að við Sigurbjörn vorum ekki með grímur. Það var eina brotið. Við máttum vera með opið og hér voru ekki of margir. Fjölmiðlar voru lítið að leggja áherslu á það þegar það loksins kom í ljós að það var ekki neitt brot framið annað en það að grímunotkun var ábótavant.“
