Ómar Ragnarsson, fjölmiðlamaður og þúsundþjalasmiður, birti magnaða ljósmynd sem hann tók út um stofugluggann í Grafarvogi í dag. Ómar birti myndina á bloggsíðu sinni og má sjá skjáskot af henni hér neðst.
„Í dag hefur verið sæmilega bjart veður en þó hefur verið snjómugga hér og þar. Út um stofugluggann við Spöngina á Borgarholti hefur mátt sjá löngum skýjabólstur yfir skýjahulunni eftir Reykjanesskaganum, sem vegna þrákelkni sinnar þar er líklegur til að vera gufubólstur, sem myndast við það að heitt loft streymir upp í kaldara loft og þéttist. Er þar með líkast til einhvers konar ígildi gosmakkar frá gosstöðinni í Geldingardölum,“ segir Ómar.
Eins og meðfylgjandi mynd ber með sér er um afar tilkomumikla sjón að ræða, en á myndinni má sjá Keili bak við blokkir í Espigerði sem eru neðst á myndinni. Gufu- eða gosbólsturinn rís svo upp hægra megin.
Ómar segir að þetta kallist á við fyrsta eldgosið sem hann minnist, Heklugosinu 1947 að því leyti til að þá var hægt að fylgjast með gangi þess mikla goss í útvarpinu heima hjá sér.
„23 gosum seinna er síðan loks hægt að horfa á gos beint út um gluggann heima hjá sér og á sama tíma virða fyrir sér mannlífið á verslunartorginu í Spönginni, og raula hið dýrlega rokklag um gluggann með textann færðan í stílinn, einhvern veginn svona:
GLUGGINN Í GOSINU.
Ég sit og gægist oft út um gluggann
á gosið þegar minnkandi´er muggann
og fólk á förnum vegi
fótgangandi´á nóttu´og degi;
það er alveg tilvalið að sjá¨!“
