Jónína Benediktsdóttir segir öll sín mistök hafa verið undir áhrifum áfengis. Það hafi verið ástæða þess að hún hafi hætt að drekka. Jónína opnaði sig í einlægu viðtali hjá Sigurlaugu M. Jónasdóttur í útvarpsþættinum Segðu mér á Rás 2.
Jónína var 48 ára gömul þegar hún byrjaði að drekka áfengi. „Þegar ég var í háskóla var mikið um hassreykingar og drykkju en ég smakkaði aldrei, ég var náttúrulega í bahá'í-trúnni þar sem þetta var stranglega bannað.“ Það var mikið um alkóhólisma í fjölskyldu hennar. Hún segir að afi hennar hafi verið mikill drykkjumaður sem fór illa með ömmu hennar. „Það er ekki fyrr en börnin mín fara að heiman og ég orðin ein, búin að lenda í ólgusjó, missa fyrirtækið mitt í hendur óreiðumanna, og allt tekið af mér, æran og mannorðið, þá komst ég að því einn daginn að rauðvín höfðaði vel til mín.“
Hún segir að hún hafi ekki upplifað að hún ætti við vandamál að stríða. „Gott fólk verður þessum djöfli að bráð og þetta er bara hreint helvíti að verða fíkill,“ segir Jónína. Hún segist hafa ákveðið að hætta eftir að hafa vaknað timbruð eftir rauðvínsdrykkju.
„En ég fer heim og er svo þreytt eftir vinnuna að ég á skilið eitt rauðvínsglas. Svo er það lygin, þetta eina glas verður að tveimur, flösku og svo er komin belja. Það er svo auðvelt að fela drykkjuna með beljunni, þá sést ekki hvað þú ert búin að drekka mikið. Öll mín mistök í lífinu hafa verið undir áhrifum áfengis.“
