Frosti Sigurjónsson, fyrrverandi þingmaður, segir í grein af vef sínum Frosti.is það vera virðingarvert af Þórólfi Guðnasyni sóttvarnarlækni að viðurkenna mistök í forsendum bólusetningar barna, vitnar Frosti í Þórólf sem segir:
„Ef öll 32.000 börn hér á landi á aldrinum 5-11 ára smitast af COVID-19 þá gæti útkoman orðið eftirfarandi: innlagnir gætu orðið 134 (í stað 100-200 sem getið var um í pistlinum), 13 lagst inn á gjörgæsludeild (í stað 16 sem getið var um í pistlinum) og um eitt barn látist (í stað 1-2 sem getið var um í pistlinum).“
Frosti segir forsenduna að öll börn smitist af Covid vera villandi og ýkja hættuna: „Er tilgangurinn að hræða foreldra eða gefa þeim raunsanna mynd af hættunni?,“ spyr Frosti.
Þá hafi Þórólfur leiðrétt að bóluefnið veitti um 90% vörn gegn smiti, hið rétta sé að bóluefnið veiti 90% vörn gegn einkennasmiti. „Stór hluti barna fær engin einkenni við smit þannig að ekki er hægt að fullyrða neitt um vörn bóluefnisins gegn smiti, enda var sú virkni ekki könnuð í þeirri rannsókn sem sóttvarnalæknir vísar til,“ segir Frosti.
„Þótt sóttvarnalæknir hafi leiðrétt tvær villur í forsendum stendur hin umdeilanlega ákvörðun hans óhögguð um að bólusetja börn gegn mildum sjúkdómi með bóluefni sem veiti óvissa vörn gegn smiti.“
Þónokkrir hafa tekið undir með Frosta, þar á meðal Ólína Þorvarðardóttir, fyrrverandi þingmaður, sem hvetur alla foreldra til að lesa skrif Frosta:
„Sú hætta er raunveruleg að börnum stafi meiri meiri hætta af bólusetningunni heldur en sjálfum sjúkdómnum, sem myndi þá þýða að fyrirhugaðar covid-bólusetningar barna verji fremur fullorðna en börnin,“ segir Ólína á Facebook.
„Sé það ætlunin stenst það engin barnaverndarsjónarmið. Gleymum því ekki að bólusetningar eru enn á tilraunastigi, og það er ekki sjálfsagt að útsetja börn fyrir afleiðingum tilrauna. Ég hvet alla foreldra til að skoða málið vel.“
