Ólína Þorvarðardóttir, fyrrverandi þingmaður og rithöfundur, segir að mál Bjarna Benediktssonar fjármálaráðherra, sé prófsteinn á það hvort samfélag okkar sé sjúkt af meðvirkni.
Bjarni var sem kunnugt er viðstaddur fjölmennan gleðskap í Ásmundarsal á Þorláksmessu þar sem sóttvarnareglur voru ekki virtar. Bjarni baðst afsökunar á aðfangadag en margir hafa kallað eftir afsögn hans vegna málsins. Sjálfur segist Bjarni ekki vera að íhuga afsögn.
Ólína tjáir sig um málið undir Facebook-færslu Eiríks Rögnvaldssonar, fyrrverandi prófessors í íslensku. Í athugasemd sagðist Ólína ekki trúa öðru en að málið fari á dagskrá um leið og þing kemur saman. Annars sé stjórnarandstaðan ekki starfi sínu vaxin. Hún bætti svo við:
„Þetta mál er að öllu leyti prófsteinn á það hvort samfélag okkar er helsjúkt af meðvirkni, eða hvort hér finnst snefill af siðferðiskröfu til þeirra stjórnmálamanna sem valist hafa til ábyrgðar í umboði almennings.“
