Ólína Kjerúlf Þorvarðardóttir, fyrrverandi þingmaður Samfylkingarinnar, skrifar hjartnæman pistil til hundsins síns á Facebook í dag.
„Skutull - hetjan litla, vinurinn trausti - er fallinn frá. Hann sofnaði á stofugólfinu hjá okkur í morgun eftir fjórtán ára viðburðaríka ævi. Skutull var aðeins 4ra mánaða þegar hann fór að fá þjálfun sem leitar og björgunarhundur hjá Björgunarhundasveit Íslands. Hans líf var helgað samfélagsþjónustu við leitar og björgunarstörf á vegum Landsbjargar í 12 ár. Síðasta útkallið sitt tók hann fyrir tveimur árum, 12 ára gamall. Nú er þjónustu hans lokið,“ skrifar Ólína.
Hún segist aldrei hafa kynnst betri eða vinnusamari hundi en Skutli.
„Hann var einstaklega ósérhlífinn og næmur - hlífði sér aldrei, lagði sig alltaf allan fram. Samstarf okkar var óskeikult alla tíð. Hann gerði mig betri, vissi alltaf hvernig mér leið, skildi mig og las eins og opna bók. Yfirleitt þurfti ekki að leiðrétta hann nema einu sinni. Hann vissi t.d. alltaf hvar lóðamörkin á húsinu mínu voru, og fór aldrei út fyrir þau þó að garðurinn væri girðingarlaus. Hann vissi alltaf hvernig best var að leita svæði og spurði mig orðalaust með augnatillitinu hvort ég vildi að hann færi í þess áttina eða hina þegar við vorum að leita saman, gerði svo eins og ég vildi án þess að ég þyrfti að sýna honum það. Hann las hug minn,“ skrifar Ólína.
„Skutull var hógvær hetja. Sannur vinur og sálufélagi. Hann skilur eftir sig ómetanlegar minningar um ævintýri og samverustundir sem eiga engan sinn líka. Sælt er að hafa svo lifað. Hans verður sárt saknað,“ skrifar hún að lokum.
