„Það er nýbúið að herða reglurnar og gera 2ja metra fjarlægð að skyldu. Leiðbeiningamyndböndin hafa gengið mánuðum saman. Hvað er svona óljóst við reglurnar? Svar: Ekkert.“
Þetta segir Ólína Þorvarðardóttir, fyrrverandi þingmaður, í færslu á Facebook-síðu sinni.
Um fátt hefur verið meira rætt undanfarna tvo sólarhringa en mynd sem birtist af Þórdísi Kolbrúnu Reykfjörð Gylfadóttur í góðra vina hópi þar sem tveggja metra reglan var ekki virt.
Eina sem er óljóst eru svörin
Á upplýsingafundi almannavarna í gær sagði Þórólfur Guðnason sóttvarnalæknir að hann teldi að Þórdís hefði ekki brotið reglur þegar hún var með vinkonum sínum. „Tveggja metra reglan á aðallega við umgengni við einstaklinga sem maður þekkir engin deili á og passa sig í fjölmenni,“ sagði Þórólfur á fundinum en bætti við að vissulega hefði ráðherra getað passað sig betur.
Ólína segir að það eina sem er óljóst séu svör Þórólfs á upplýsingafundinum.
„Hvers vegna? Jú vegna þess að einn ráðherra gat ekki fylgt reglunum og nú er heil ríkisstjórn ásamt sóttvarnarteymi fallin í meðvirkni með ráðherranum. Fólk hefur þurft að fresta brúðkaupum og fermingum - hætta við afmælisveislur og jarða ástvini í kyrrþey. Hvar er nú reiði Víðis?,“ spurði Ólína.
Breyta þarf upplýsingum
Í viðtali við RÚV í gær sagði Víðir Reynisson yfirlögregluþjónn að breyta þurfi upplýsingum á vefnum COVID.is til að tryggja samræmi milli þeirra upplýsinga sem koma þar fram og nýjustu auglýsingar heilbrigðisráðherra. Á vef COVID.is kemur skýrt fram að hvar sem fólk kemur saman og í allri starfsemi þurfi að hafa tvo metra á milli þeirra sem ekki deila heimili.
Í frétt RÚV var bent á að samkvæmt nýjustu auglýsingu heilbrigðisráðherra um samkomutakmarkanir segi: „Á samkomum, öllum vinnustöðum og í allri annarri starfsemi, m.a. þeirri sem talin er upp í 3. gr., skal tryggja að hægt sé að hafa a.m.k. 2 metra á milli einstaklinga sem ekki deila heimili.“ Sagði Víðir að reglurnar væru ekki nógu skýrar og á dagskrá væri að gera þær skýrari.
Undarleg kúvending
Miklar umræður hafa spunnist um þetta á samfélagsmiðlum og sitt sýnist hverjum. Gunnar Smári Egilsson, stofnandi Sósíalistaflokksins, deilir frétt RÚV sem vitnað er til hér að framan og segir:
„Var Þórólfur að breyta sóttvörnum þannig að 2 metrar gilda bara milli ókunnugra? Þannig ef ég rekst á skólabróður minn úr tímakennslu í Mýrarhúsaskóla á Laugaveginum, má ég þá faðma hann? Þetta er undarleg kúvending, við höfum sleppt allskonar út af covid; barnaafmælum, útförum, heimsóknum. Þetta var þá bara allt einn misskilningur sem Þórdís Kolbrún og æskuvinkonurnar afhjúpuðu; covid smitast ekki milli fólks sem þekkist. Ja hérna hér. Hér eftir trúi ég engu sem mér er sagt.“
Ólafur Teitur Guðnason, aðstoðarmaður ferðamálaráðherra, segir í athugasemd í þræði Gunnars að ekki sé verið að breyta neinum reglum heldur leiðrétta ósamræmi þar sem COVID-vefurinn er með strangara orðalag en reglan sem sannarlega gildir.
„Og Þórólfur var alveg skýr á því að það er ekki skilyrðislaus krafa á alla að hafa 2 metra á milli sín. Hann talaði um ótengda aðila og að það væri undir hverjum og einum komið að meta,“ sagði Ólafur Teitur.
