„Er það meðvituð stefna að tala kjarkinn úr þjóðinni í kófinu? Að sökkva okkur niður í bölmóð og sjálfsvorkunn? Hver fréttatíminn af öðrum undirlagður af því að allt sé svo erfitt.“
Þetta segir Ólína Þorvarðardóttir, rithöfundur og fyrrverandi þingkona, í færslu á Facebook-síðu sinni. Ólína virðist vera búin að fá sig fullsadda af neikvæðum fréttum sem hafa einkennt árið 2020. Hún segist hafa fengið alveg nóg eftir að hafa hlustað á hádegisfréttir RÚV í gær, sunnudag.
Kórónuveirufaraldurinn hefur sett svip sinn á líf heimsbyggðarinnar það sem af er ári og ekki er útséð hvenær faraldurinn verður á bak og burt.
„Félagsleg einangrun og vanlíðan. Gamla fólkið er svo einmana. Börnum og ungmennum líður svo illa. Almenningur er orðinn svo þreyttur á ástandinu, o.s. frv., o.s. frv. Dag eftir dag dynja þessar fréttir á okkur með viðtölum og vangaveltum um vanlíðan almennings,“ segir Ólína sem heldur áfram:
„Þetta er ekki að hjálpa! Fréttastofurnar verða að fara að finna eitthvað annað til að tönnlast á. Við vitum öll að kófið er ekki skemmtilegt - það þarf ekki að segja okkur það. Við vitum öll af okkar ættingjum, ungum og öldnum, að við söknum þess að knúsa og kyssa. Halló!
Þetta eru samt ekki raunverulegir erfiðleikar. Þetta er bara leiðinlegt meðan á þessu stendur, en það líður hjá - við verðum að trúa því og þruma þetta af okkur. Sjálfsvorkunn og eymdarvæl gagnast engum.“
Ólína endar færslu sína á þessum orðum:
„PS: Ég hef miklu meiri áhyggjur af afkomu þeirra þúsunda Íslendinga sem misst hafa vinnu og tekjur með tilheyrandi vanda og vanlíðan - heldur en fólki sem þarf að láta sér leiðast heima. Grrrr ...“
