Ólína Þorvarðardóttir, doktor í þjóðháttafræði og fyrrverandi þingkona, segist ekki ætla að taka áhættuna af því að fara í sund í því ástandi sem nú ríkir.
Ný reglugerð heilbrigðisráðherra tekur gildi á miðnætti og felur hún meðal annars í sér að heimilt verður að opna sund- og baðstaði. Verður heimilt að hafa opið fyrir allt að 50% af hámarksfjölda gesta samkvæmt starfsleyfi. Ólínu lýst ekki á blikuna og ætlar að bíða með að fara í sund.
„Ég er að hugsa um þetta með sundlaugarnar. Að mæta ásamt fjölda fólks (allt að 350 manns) í sundlaugarnar og stinga sér ofan í vatnið þar sem hugsanlega smitað fólk er líka að svamla, blása frá sér og svitna í sama vatnið og leikur um mig ... fara svo í pottinn þar sem fólk svitnar enn meira og andar út í gufuna hugsanlegum kórónuveirum ... þetta er ekki lekker tilhugsun. Ég ætla að bíða með þetta,“ segir hún á Facebook-síðu sinni.
Ummæli hennar ríma ágætlega við ummæli Kára Stefánssonar, forstjóra Íslenskrar erfðagreiningar, í Kastljósi í gærkvöldi þar sem hann klóraði sér í kollinum yfir opnun sundstaða. Hann telur það óráðlegt.
„Til dæmis að hleypa 350 manns á sama tíma í Laugardalslaugina, ég skil ekki hvað að baki því býr. Hvaðan fá menn þá vitneskju að þessi veira berist ekki á milli manna í sundi? Það hlýtur einhver að hafa vitjað sóttvarnalækniss í draumi og sagt honum þetta, því hvergi annars staðar fær hann þetta,“ sagði Kári meðal annars.
