„Það er engin kennslubók í hagfræði sem getur gefið okkur leiðbeiningar í gegnum þetta ástand. Vegna þess að þetta er ólíkt öllum öðrum kreppum. Þar sem stjórnvöld hafa verkefni að örva hagkerfið.“ Þetta segir Óli Björn Kárason, formaður efnahags- og viðskiptanefndar Alþingis, en hann var gestur Sigmundar Ernis í fréttaskýringaþættinum 21.
Spurningar hafa vaknað um það hvort ráðast þurfi í frekari aðgerðir til að rétta af þann mikla halla sem aðgerðirnar koma til með að hafa á ríkissjóð. Óli Björn telur mikilvægt að til að örva hagkerfið í framhaldi faraldursins þurfi að létta á ýmsu innan „báknsins“.
Verður að passa innviði
Þá þarf helst að huga að því að létta byrðum á fyrirtæki. „Verkefnið sem blasir við okkur er að tryggja að innviðir í viðskiptahagkerfinu og í öllum fyrirtækjum molni ekki. Að þeir verði til. Að það sé passað upp á þá. Ef þeir molna þá verður viðspyrnan sem við eigum kost á þegar þokunni léttir ekki eins kröftug og annars.“
„Við komumst ekki hjá því að horfa á ríkisreksturinn og taka til þar. Við þurfum líka að endurskoða skattakerfið, ekki síst atvinnulífsins. Það verður að gera það með þeim hætti að örva efnahagsstarfsemi, ekki drepa hana í dróma, og það gerum við ekki öðruvísi en að létta byrðum.“ Ekki einungis er það skattakerfið sem þarf að endurskoða heldur einnig regluverkið.
Óli Björn vill innleiða svokallaða fjórtán daga reglu. „Hún segir að stjórnvöld, eftirlitsstofnanir og aðrar stofnanir á vegum ríkisins skulu svara öllum erindum, einstaklinga og fyrirtækja innan fjórtán daga. Í staðinn fyrir að menn eru hér að bíða mánuðum og jafnvel misserum eftir einföldu svari.“
Einfaldanir á slíku og létting byrða á fyrirtæki eru það sem munu efla nýsköpun og hjálpa fyrirtækjum að komast aftur út í viðskiptahagkerfið, sem er eitt af því sem keyrir áfram atvinnulíifð. „Það er augljóst að tekjur ríkisins af starfsemi viðskiptahagkerfisins munu aukast þó að þú léttir byrðarnar og dregur úr einhverjum álögum. Því að kakan hefur stækkað.“
