Ólgan eykst hjá Vinstri grænum þessa stundina, en Lilja Rafney Magnúsdóttir, varaþingmaður flokksins, segist efins um að hún eigi ennþá samleið með flokknum.
Hún greinir frá þessu á Facebook-síðu sinni, en ástæðan er sú að Svandís Svavarsdóttir, matvælaráðherra, hyggst leggja fram frumvarp á Alþingi í haust er varðar svæðaskiptingu á kvóta strandveiða.
„Í stað þess að tryggja nægar aflaheimildir í Strandveiðikerfið í 48 daga á öllu landinu kýs ráðherra að brjóta niður núverandi kerfi sem mikil þverpólitísk vinna var lögð í og markmiðið var að tryggja aflaheimildir í þessar umhverfisvænu og sjálfbæru veiðar sem efla sjávarbyggðir landsins!“ skrifar Lilja sem kallar ákvörðun ráðherra illa ígrundaða og þvert á stefnu Vinstri grænna.
„Ég er hugsi yfir því hvort ég eigi samleið með Vinstri grænum lengur þegar svo illa ígrundaðar ákvarðanir eru gerðar án samráðs þvert á stefnu VG um að efla Strandveiðar!“
