Ólafur Ísleifsson, þingmaður Miðflokksins, segir að nauðsynlegt sé að ráðast í úttekt á þeim atburðum sem urðu eftir hrun þegar þúsundir Íslendinga misstu heimili sín.
Ólafur sagði þetta í umræðum á Alþingi í gær þar sem meðal annars var rædd skýrsla forsætisráðherra um ábendingar sem varða stjórnsýsluna í rannsóknarskýrslu Alþingis eftir hrun. Ólafur benti á að áherslan í skýrslunni hefði verið á aðdraganda hrunsins og breytingar á stjórnsýslu eftir það.
„En enda þótt hrunið hafi verið ógott var eftirleikur þess kannski hálfu verri. Margir misstu hús sín og íbúðir og sparnað sem safnað hafði verið yfir langan tíma. Eignatjón er af óþekktum stærðum á heimsmælikvarða og sögulegan kvarða eins og rakið hefur verið í viðurkenndum hagfræðiritum. Miðað við upplýsingar opinberra aðila sem m.a. koma fram í svörum ráðherra við fyrirspurnum frá mér voru það ekki færri en 10.000 fjölskyldur sem hrepptu þau örlög að missa húsnæði sitt. Foreldrar máttu þúsundum saman leiða börnin sér við hönd út af heimilunum með öllu því raski, angist og þjáningu sem slíku fylgir. Svona snerti eftirleikurinn tugi þúsunda Íslendinga.“
Ólafur sagði að sú spurning vakni hvort annað eins gæti hafa gerst í öðru landi nema eftir stórfelldar náttúruhamfarir eða styrjaldarátök. Ólafur kvaðst ekki vilja kasta rýrð á það sem stjórnvöld leituðust við að gera en benti á að skjaldborgin svokallaða hafi aldrei risið og fyrrgreindar tölur séu til marks um það.
„Við þurfum úttekt á þessum atburðum, húsnæðismissi tugþúsunda Íslendinga sem varpað var út á götu, mat á aðgerðum sem gripið var til og mat á öðrum kostum sem kunna að hafa verið fyrir hendi. Við þurfum það sem Hagsmunasamtök heimilanna kalla rannsóknarskýrslu heimilanna,“ sagði Ólafur og bætti við að Miðflokkurinn ætli að bregðast við ákalli Hagsmunasamtaka heimilanna og leggja fram skýrslubeiðni um rannsóknarskýrslu heimilanna.
„Miðflokkurinn hefur unnið ötullega að hagsmunum heimilanna í góðu samstarfi við Hagsmunasamtök heimilanna með frumvörpum, þingsályktunartillögum og málflutningi hér á Alþingi. Nefni ég lyklafrumvarp, frumvarp um vexti og verðtryggingu sem felur í sér tangarsókn úr öllum höfuðáttum gegn verðtryggingunni, frumvarp sem ætlað er að koma í veg fyrir að nokkur maður þurfi að þola innheimtuaðgerðir af hálfu aðila sem ganga um eftirlitslausir og bætta umgjörð lánshæfismats og vanskilaskrár þannig að óvandaðir aðilar geti ekki misnotað kerfið til að varpa fólki fyrir þau björg sem það að lenda á vanskilaskrá felur í sér í fjárhagslegu tilliti. Við höfum verk að vinna við að auka neytendavernd á fjármálamarkaði og verja þannig heimili landsmanna.“
