Ólafur F. Magnússon, fyrrverandi borgarstjóri, hvetur Guðmund Franklín Jónsson, fyrrverandi formann Hægri grænna, til að ráðfæra sig við vini og ættingja áður en hann „anar út í vitleysuna.“
Guðmundur Franklín hefur verið orðaður við framboð til forseta Íslands og kveðst hann ætla að gera upp hug sinn á næstunni. Guðmundur virðist alls ekki útiloka framboð og gæti vel farið svo að nafn hans verði að finna á kjörseðlinum í vor.
Ólafur F. Magnússon, sem var borgarstjóri árið 2008, vandar Guðmundi ekki kveðjurnar á Facebook-síðu sinni og hvetur hann til að „virkja jarðtengingu sína“ eins og hann orðar það.
„Það væri óábygt í meira lagi að stefna þjóðinni í forsetakosningar á þeim tímun sem nú eru uppi. Ég bið þig, Guðmundur Franklín, þó ekki væri nema fyrir þig og vandamenn þína, - að gera sig ekki að athlægi með framboði. Til þess hefur þú ekkert bakland og enn minna traust.“
Guðmundur hefur komið víða við á undanförnum árum og meðal annars verið hótelstjóri í Danmörku og Prag. Þá starfaði hann sem verðbréfamiðlari á Wall Street. Guðmundur var formaður Hægri grænna sem buðu fram í Alþingiskosningunum 2013. Flokkurinn fékk 1,7% atkvæða og kom ekki manni á þing. Þá hugðist Guðmundur bjóða sig fram til forseta árið 2016 en dró framboð sitt til baka.
