Ólafur Kr. Guðmundsson, varaborgarfulltrúi Sjálfstæðisflokksins og íbúi í Grafarvogi, er óhress með það hversu seint byrjað er að hreinsa götur í hverfinu. Í samtali við Morgunblaðið í dag bendir hann á að ekki standi til að byrja að hreinsa síðustu hverfin í Grafarvogi fyrr en 11. júní.
„Það er í raun ótrúlegt hvað menn byrja seint að hreinsa götur hérna,“ segir hann og bætir við að þann 11. júní verði nánast byrjað að hausta aftur.
Í frétt Morgunblaðsins er bent á að talsverð umræða hafi verið um þetta á Facebook-síðu Reykjavíkurborgar þar sem íbúar Grafarvogs – og annarra hverfa – hafa lýst vonbrigðum sínum. Byrjað var að hreinsa götur 30. apríl og er farið skipulega yfir hvert og eitt hverfi borgarinnar. Það vill svo til að Grafarvogur er síðasta hverfið til að verða hreinsað.
Ólafur bendir á að erlendis séu götur hreinsaðar mánaðarlega. Hér á landi séu þær aðeins hreinsaðar á vorin og sumrin. „Ef þú myndir keyra Strandveg núna fyrir framan Gylfaflöt þá er ekkert nema drullutaumurinn með fram öllu þar og ef þú ferð í hann þá þyrlast upp ryk í allar áttir,“ segir Ólafur við Morgunblaðið og bætir við að óþolandi sé að búa við svona óþrifnað.
Á heimasíðu Reykjavíkurborgar má sjá hvenær götur í hverfum borgarinnar verða hreinsaðar.
