Ólafur F. Magnússon, læknir og fyrrverandi borgarstjóri, minnist kollega síns, Sigurðar Samúels Sigurðssonar, sem lést á heimili sínu í Farmers Branch í Texas í Bandaríkjunum þann 9. október síðastliðinn. Sigurðar var minnst í Morgunblaðinu í gær.
Sigurður var læknir að mennt en hann lauk prófi frá Háskóla Íslands árið 1977. Árið 1979 fór hann að landamærum Taílands og Kambódíu í flóttamannabúðir á vegum Rauða kross Íslands og International Committee of the Red Cross, en þar var hann yfirmaður íslenska læknateymisins og sá um að veita flóttafólki og fórnarlömbum stríðs læknisaðstoð fram á vor 1980.
Sigurður starfaði á Landspítalanum til 1983 þegar hann flutti til New York og hóf sérfræðinám í svæfingalækningum. Samhliða læknastörfum var hann aðstoðarprófessor við University of Iowa þar sem hann var kosinn kennari ársins skólaárið 1989 til 1990. Árið 1994 flutti hann með fjölskyldu sinni til Texas þar sem Sigurður hóf einkarekstur. Var hann meðal annars meðeigandi í læknateymi sem sérhæfði sig í hjartaskurðlækningum og starfaði sem svæfingalæknir sleitulaust fram í ágústmánuð síðastliðinn.
Leiðir þeirra Ólafs F. Magnússonar og Sigurðar lágu fyrst saman árið 1956 þegar Sigurður og foreldrar hans dvöldu hjá fjölskyldu Ólafs í Arlington á jólum 1956. „Ég þekkti eðli málsins samkvæmt vel til Sigurðar og vorum við skólabræður í MH á árunum 1968-1971, þegar hann varð stúdent,“ segir Ólafur sem minntist Sigurðar á Facebook-síðu sinni í gær.
„Guð blessi minningu góðs drengs og kærs kollega. Ég minnist hans með hlýju og þakka sífellt fyrir sameiginlegt jólahald okkar í Bandaríkjunum fyrir 64 árum.“
Sigurður var jarðsunginn frá Fossvogskirkju í gær.
