Ólafur Stephensen framkvæmdastjóri Félags atvinnurekenda bendir á vandræðalega staðreynd á Facebook síðu sinni en eftir öll fögru loforðin um stuðning við Úkraínu hefur Reykjavíkurborg ekkert gert.
„Hinn 27. apríl, eftir nokkurra vikna vandræðagang, samþykkti umhverfis- og skipulagsráð Reykjavíkur að nefna þetta litla torg á gatnamótum Garðastrætis og Túngötu, þar sem Rússland starfrækir sendiráðsbyggingar sínar, til að „senda skýr skilaboð um stuðning við úkraínsku þjóðina,“ skrifar Ólafur.
„Torgið var nefnt Kænugarður / Kýiv-torg. Sama dag var umhverfis- og skipulagssviði borgarinnar falið að „hefja undirbúning að gerð skiltis fyrir torgið“. Nú, þremur mánuðum síðar, er ekkert skilti og engin merki um þá samstöðu sem Reykvíkingar hugðust sýna Úkraínu.“
„Hversu hægt vinnur þetta borgarkerfi eiginlega? Svo er annað mál að samstöðutáknið mætti verða sýnilegra en venjulegt skilti. Bezt væri ef fáni Úkraínu fengi að blakta á Kýiv-torgi dag og nótt, upplýstur þegar dimmt væri. Það færi þá ekki framhjá fulltrúum stríðsglæpamannanna í Kreml þegar þeir mættu í vinnuna með hverjum Reykvíkingar standa. Einar Þorsteinsson, er ekki hægt að treysta þér til að ganga í að
klára þetta mál þannig að sómi sé að?“ spyr Ólafur að lokum
