Ólafur Hand, fyrrverandi upplýsingafulltrúi Eimskips, hefur verið sýknaður í Landsrétti af ákæru um ofbeldi gegn barnsmóður sinni. DV greinir frá sýknudómnum sem féll í dag.
Greint var frá því í janúar 2019 að Ólafur hefði verið sakfelldur í héraðsdómi í desember 2018. Umrætt atvik sem ákært var fyrir átti sér stað sumarið 2016 þegar barnsmóðir Ólafs kom á heimili hans og eiginkonu hans til að sækja barn þeirra.
Í frétt DV í janúar 2019 var hún sögð hafa komið fyrr en áætlað var og í kjölfarið hafi komið til átaka. Í héraðsdómi var Ólafur sakfelldur fyrir að taka barnsmóður sína hálstaki og þrengja að hálsi hennar.
Ólafur neitaði sök staðfastlega og sögðu bæði hann og eiginkona hans að barnsmóðirin hefði ruðst inn í húsið og látið öllum illum látum. Þau kærðu atvikið og eftir að barnsmóðurinni barst kæran kærði hún Ólaf og eiginkonu hans fyrir líkamsárás.
Dómur Landsréttar hefur ekki verið birtur á vefnum. Eftir að fjallað var um dóminn árið 2019 missti Ólafur starf sitt sem upplýsingafulltrúi og markaðsstjóri Eimskipa.
