Ólafur G. Flóvens, jarðeðlisfræðingur og fyrrverandi forstjóri Íslenskra orkurannsókna, segir að ef hraun kemur upp á óheppilegum stað sé Grindavíkurbær í verulegri hættu. Þetta er meðal þess sem kemur fram í viðtali við Ólaf í Morgunblaðinu í dag.
Jarðskjálftahrina hefur staðið yfir undanfarnar vikur á Reykjanesskaga og orsakast þeir af landrisi undir Svartsengi. Í frétt Morgunblaðsins kemur fram að ótvírætt sé að kvikusöfnun sé að eiga sér stað einhvers staðar undir Reykjanesinu.
„Þessir skjálftar eru bara pirrandi fyrir íbúa en ekki skaðlegir. Raunverulega ógnin er fyrst og fremst eldgosið, þá er spurning hvar það kemur upp og svo hvert hraunið gæti runnið,“ segir Ólafur við Morgunblaðið.
Einn möguleikinn er sá að á 15 til 20 kílómetra dýpi undir Fagradalsfjalli sé að eiga sér stað kvikusöfnun og gæti gas frá henni verið að leita upp í áttina að Svartsengi. Þá sé einnig möguleiki á því að hluti kvikunnar sé að leita upp undir Svartsengi.
„Við vitum að þarna er leið, að minnsta kosti fyrir gas, undir jarðhitakerfinu, svo það er vissulega hætta á eldgosi þarna og sú hætta er eflaust veruleg því eitthvað er þessi kvika að leita,“ segir Ólafur og bendir á að ef hraun kemur upp á óheppilegum stað sé Grindavíkurbær í verulegri hættu. Bendir hann á að Grindavík sé reist á ungu hrauni.
