Ólafur G. Einarsson, fyrrverandi alþingismaður og ráðherra, er látinn níræður að aldri. Greint er frá andláti hans í Morgunblaðinu í dag. Ólafur lést á hjúkrunarheimilinu Sóltúni í gær.
Ólafur fæddist á Siglufirði 7. júlí 1932 og ólst þar upp. Hann lauk stúdentsprófi frá MA 1953 og stundaði meðal annars nám í læknisfræði árin 1953–1955 áður en hann lauk lögfræðiprófi frá HÍ árið 1960.
Ólafur kom víða við á ferli sínum í atvinnulífinu og var meðal annars sveitarstjóri í Garðahreppi á árunum 1960-1972. Hann var kjörinn á þing fyrir Sjálfstæðisflokkinn árið 1971 og sat á þingi til ársins 1999.
Í mörg ár, eða frá 1979 til 1991, var hann þingflokksformaður Sjálfstæðisflokksins, menntamálaráðherra á árunum 1991 til 1995 og forseti Alþingis frá 1995 til 1999. Þá sat hann í bankaráði Seðlabankans á árunum 1998 til 2007 og var formaður þess frá 2001 til 2006.
Í andlátstilkynningu Morgunblaðsins í dag er rifjað upp viðtal í tilefni af 85 ára afmæli hans árið 2017.
Þar sagði hann meðal annars:
„Árin eru orðin mörg, en ég get varla kvartað, heilsan alveg sæmileg og geðið gott. Ég hef verið bókamaður, og alltaf haft gaman af kveðskap og vísum, stjórnaði m.a. hagyrðingamótum. En mesta ánægjan var að veiða. Það hef ég gert lengst í Sandá í Þistilfirði. En nú er því lokið þó að minningar um sporðaköstin lifi.“
