Ó­hugnan­leg skila­boð ganga á milli fólks: Árás sögð yfir­vofandi í mið­bænum um helgina

Ó­hugnan­leg skila­boð ganga nú á milli fólks á sam­fé­lags­miðlum þar sem varað er við yfir­vofandi árás í mið­borginni um helgina. Margeir Sveins­son yfir­lög­reglu­þjónn segir að lög­regla kannist við þessi skila­boð.

Nokkrar út­gáfur af skila­boðum eru í um­ferð þar sem fram kemur að ein­hvers konar hefndar­á­rás sé í undir­búningi vegna á­rásarinnar á Banka­stræti Club síðast­liðið fimmtu­dags­kvöld. Hátt í 30 ein­staklingar réðust þá inn á staðinn og veittu þremur ein­stak­lingum á­verka með hníf.

Í skila­boðunum sem ganga á milli fólks eru fórnar­lömb þeirrar á­rásar sögð vera með á­rásina í undir­búningi þar sem ráðist verður á dyra­verði á nánar til­greindum skemmti­stöðum í mið­borginni. Þá kemur fram að ó­breyttir borgarar gætu einnig orðið fyrir barðinu á hópnum

„Mælt er með að fólk haldi sig frá bænum og í raun bara að staðirnir opni ekki um helgina,“ segir meðal annars í einum skila­boðum.

Margeir Sveins­son, yfir­lög­reglu­þjónn hjá lög­reglunni á höfuð­borgar­svæðinu, segir í sam­tali við Frétta­blaðið að lög­regla kannist við að þessi skila­boð séu í um­ferð.

„Við erum bara að meta þetta og skoða og teljum okkur vita svona nokkuð hvaðan þetta kemur. Þannig að við ætlum að reyna að stoppa þetta í fæðingu,“ segir Margeir við Frétta­blaðið.