Ófremdarástand er nú á Spáni, en yfirvöld þar í landi neyddust til að banna sjósund í gær á vinsælum strandstöðum á Sitges-svæðinu vegna hættu á hákarlaárásum. Fréttablaðið fjallar um málið.
Fram kemur að þrír hákarlar hafi sést undanfarna daga á sundi í nágrenni við strendur á norðanverðum Spáni, síðast í gær við baðstrendurnar Fragata, Ribera, Bassa Rodona og Estanyol. Umræddar strandir eru geysivinsælar meðal ferðamanna, og talið er að þónokkrir Íslendingar séu á svæðinu.
Það eru þó ekki bara hákarlar sem eru að valda usla á Spáni, heldur er veðrið líka til vandræða. Mikil hitabylgja hefur geisað á Spáni síðustu vikur. Hæsti hiti vikunnar á Spáni er um 46 gráður.
Fréttablaðið greindi frá því í gærkvöld að Íslendingar ættu í erfiðleikum í hitanum.
„Ég hef aldrei verið í svona miklum hita,“ var haft eftir Maríu Kristjánsdóttur en hún og fjölskylda hennar eru stödd á Spáni.
„Systir mín býr í Valladolid og það er svaka hitabylgja þar akkúrat núna, hitinn er í kringum 40 til 41 gráða þar núna. Þetta er fáránlegt, það er ekki líft,“ segir María.
