Oddur Helgi Halldórsson, fyrrverandi bæjarfulltrúi á Akureyri og áhugamaður um hjólreiðar og útivist, má ekki hjóla í gegnum Vaðlaheiðargöng – ekki frekar en aðrir sem vilja fara á reiðhjóli í gegnum göngin.
Oddur veltir fyrir sér ástæðunum fyrir þessu í athyglisverðri grein á vef Vikublaðsins á Akureyri.
„Vaðlaheiðargöng eru 7500metra löng, vegbreidd er 7metrar. Umferðarhraði er 70km/klst. Vaðlaheiðargöng eru einum metra víðari en önnur tvíbreið göng á Íslandi. Leyfilegt er að fara um göngin á opnum farartækjum, eins og vélhjólum og vespum. Ekki má hjóla í gegnum göngin.“
Oddur bendir á að flest göng á Íslandi séu svipuð að því leyti að hámarkshraði í þeim er 70 kílómetrar á klukkustund og ekki má fara gangandi eða ríðandi í gegnum þau. Segir hann að hjóla megi í gegnum öll göng á Íslandi, nema Vaðlaheiðargöng og Hvalfjarðargöng og veltir hann fyrir sér ástæðum þess.
„Hver eru rökin fyrir að bannað sé að hjóla gegnum Vaðlaheiðargöng? Ekki umferðarhraði. Hann er sá sami og í öðrum göngum. Ekki vegalengd, Norðfjarðargöng og Héðinsfjarðargöng samanlögð, eru lengri. Ekki vegbreidd. Vaðlaheiðargöng eru breiðustu göng á Íslandi fyrir utan þrefalda hluta Hvalfjarðarganga. Ekki umferðarmagn, því það má hjóla á flestum vegum á Íslandi óháð umferðarmagni. Samt er oftast 90km/klst. hámarkshraði á þjóðveginum. Ekki er það vegna þess að þeir eru hræddir við að geta ekki rukkað, því mótorhjól eru gjaldfrjáls og reiðhjól væru það þá væntanlega líka. Ekki af því þeir eru hræddir við mengun, þá þyrfti aukasúrefni inn í neyðarrýmin ef hættulegt væri að dvelja lengi inn í göngunum. Enda eru göngin hönnuð til að hreinsa sig af CO2. (halla niður að báðum gangamunnum)“
Oddur segir að líkleg ástæða þess að hjólreiðar séu bannaðar í Hvalfjarðargöngum vera þá að þar er veghalli talsverður og göngin lægst í miðjunni þar sem mengun gæti farið yfir óæskileg mörk. Þá eru brattar brekkur beggja vegna upp úr göngunum en það er ekki fyrir því að fara í Vaðlaheiðargöngum.
„Mikil vakning er í hjólreiðum landsmanna. Hér á Akureyri er gífurlegur fjöldi fólks sem hjólar sér til ánægju og heilsubótar. Aðstaðan hefur stórbatnað undanfarin ár og fer enn batnandi,“ segir Oddur.
Þeir sem vilja fara austur yfir Vaðlaheiði þurfa að fara yfir Víkurskarð eða gamla veginn yfir Steinsskarð. Það er töluvert lengri og torfærari leið en að fara í gegnum göngin.
„Með tilkomu gangana varð samgangur beggja vegna Vaðlaheiðar enn meiri en hann var. Margir sækja vinnu yfir heiðina. Mjög margir sumarbústaðir og hjólhýsasvæði eru í Fnjóskárdal og ég er viss um að ef hjóla mætti gegnum göngin myndu hjólreiðar aukast mikið austur yfir heiði. Finnst eftir að hafa farið í gegnum þetta að einu rökin fyrir að banna hjólreiðar gegnum göngin séu: Af því bara!!“
