Óbólu­sett Margrét reynir að smitast af Covid: „Ég lét hana anda ofan í mig“

Margrét Frið­riks­dóttir, einn helsti and­stæðingur bólu­setninga á Ís­landi, greinir frá því á Face­book í gær að hún hafi í­trekað reynt að smitast að Co­vid-19 eftir að dóttir hennar greindist smituð.

„Kæru vinir ég tel nauð­syn­legt að tjá mig um það sem hefur gerst á heimilinu þessi jólin, en þannig er mál með vexti að vin­kona dóttur minnar kom í heim­sókn þann 22. desember og hringdi svo á jóla­dag og til­kynnti okkur að hún hefði greinst já­kvæð með Co­vid. Dóttir mín var svo farin að finna fyrir ein­kennum um kvöldið þannig ég fór og keypti hrað­próf fyrir okkur mæðgurnar þrjár,“ skrifar Margrét.

„Við tókum allar test og yngri stelpan mín greinist já­kvæð en við nei­kvæðar, ég tók svo annað test daginn eftir og þá er sú yngri aftur já­kvæð en ég og eldri dóttir mín aftur nei­kvæðar. Við pöntuðum því tíma fyrir stelpuna í PCR próf á Suður­lands­braut. Ég hafði sam­band við net­spjallið á Co­vid.is og sagði þeim frá þessu og spurði hvort ég þyrfti að gera ein­hverjar ráð­stafanir hér á heimilinu en var svarað að þar sem við greinumst ekki já­kvæðar og ekki með nein ein­kenni þá þyrftum við ekki að koma í PCR próf,“ bætir hún við.

Hún segir dóttir sína hafa verið með mjög væg ein­kenni og haus­verk í tvo daga en engan hósta og hita. Vægt Verkja­lyf dugði til að slá á haus­verkinn.

„Ég hef ekki farið leynt með það að ég er ekki bólu­sett en ég vil endi­lega fá mót­efnið sem er sam­kvæmt vísindunum lang­best og miklu betra en bólu­setning. Ég reyndi því að smitast af dóttur minni með því að drekka úr glasinu hennar og við vorum ekkert að passa okkur hér á heimilinu, spiluðum hér við borð­stofu­borðið og lét hana anda ofan í mig. Ekkert gekk og mér hefur ekki tekist að smitast en þá en er búin að taka þrjú hrað­próf og er ein­kenna­laus.“

Margrét segir þetta ekki koma sér á ó­vart að hún smitaðist ekki þar sem hún hefur aldrei fengið flensu líkt og faðir seinn sem fékk aldrei flensu á sínum 62 árum sem hann lifði.

Í ljósi þess finnst henni mikil­vægt að það séu gerðar rann­sóknir á því hvers vegna sumir séu al­ger­lega ó­næmir fyrir veirunni.

Hún segir stelpuna sína vera orðin hress eftir þessa „hræði­legu“ co­vid veikindi sem hefur sett sam­fé­lagið á hliðina. Hún óskar jafn­framt lands­mönnum gleði­legs nýs árs.

„Lifið heil og Guð blessi ykkur,“ skrifar Margrét að lokum en hægt er að lesa færsluna í heild sinni hér.